En tot contunhar damb era recèrca aplicada ena nhèu e lauegi qu’a realizat es darrèri ans eth Centre de Lauegi d’Aran, aguesta sason realize experimentacion sus er efècte deth povàs deth Sahara ena estabilitat dera nhèu.
Aguest ei un projècte que s’amie a tèrme en collaboracion damb era Universitat de Grenòble, qu’apòrte ua estudianta de mastèr que realizarà era sua tesina en aguesta matèria. Ath delà d’arrecuélher donades referentes as entrades naturaus de povàs qu’eth vent deth sud rossègue des deth desèrt deth Sahara, coma era qu’arribèc eth passat 21 de hereuèr, aguesta investigadora simule es adveccions de povàs en parcelles controtlades enes immediacions dera estacion d’esquí dera Val d’Aran, Baqueira Beret, que tanben collabòre en aguest projècte.
Es resultats d’aguesta recèrca permeteràn conéisher melhor quin ei er efècte deth povàs en “mantèl” de nhèu e atau poder preveir melhor eth perilh de lauegi qu’afècte tant es infrastructures e carretères coma as persones que realizen activitats iuernaus.
Hè 25 ans qu’era Val d’Aran compde damb un tecnic de lauegi. A compdar dera sason 2003/2004, damb era incorporacion d’un dusau tecnic, es activitats e es productes restacadi damb era seguretat e es lauegi que se genèren des deth Conselh Generau d’Aran an anat creishent graduaument. Era sason 2010/2011 se contracte un tresau compausant dera equipa, damb un perfil mès scientific, damb era idèa de potenciar era investigacion aplicada. Açò culminèc damb era creacion deth Centre de Lauegi dera Val d’Aran qu’ei plaçat en Casau.
Es principaus activitats que se desvolòpen en Centre de Lauegi d’Aran son:
– Prediccion de lauegi: informacion jornalièra entàs persones que realizen activitats ena montanha tàs 08:00 ores; prediccion locau entàs carretères de Beret e Bonaigua
– Cartografia: classament deth terren de lauegi (ATES).
– Formacion: corsi de Seguretat en Terren de lauegi
– Investigacion: diferentes linhes d’investigacion aplicada.
Vielha, 6 d’abriu de 2016
Conselh Gnerau d’Aran: Núria Sanjuan
Hònt: Centre de Lauegi d’Aran