Der 1 ath 3 de mai, era pista de gèu deth FC Barcelona acuelhec era Copa Internacionau Ciutat de Barcelona, competicion Internacionau Open, puntuable entara Liga Catalana de Patinatge Artistic 2014-2015, a on participèren mès de 50 patinadors e patinadores de clubs de patinatge d’arreu der estat e internacionaus coma: CEGVA, FCB, CEPAP, Club de Hielo Huarte (Pamplona), Club Hielo Txurri- Berri (Donostia), Andòrra Club Gèu (Andòrra), Valdemoro Ice Team (Madrid) e CSG Cergy (França).
Era competicion dèc eth trèt de gessuda eth passat diuendres 1 de mai a on se disputèren progressivaments es competicions autonomiques, e contunhèc dissabte e dimenge damb es categories Open. Era pròva, adreçada a totes es categories de patinatge artistic, tant autonomiques A e B coma nacionaus, atau coma era modalitat de balet sus gèu en totes es sues categories.
En Basic Nocive femenin, era aranesa Iria España (CEGVA) se proclamèc tresau classificada.
En Benjamí femenin, eth pòdi siguec tot aranés: Claudia Capdevila (CEGVA) se proclamèc campiona, Júlia Feixa (CEGVA) subcampiona e Jara Beso (CEGVA) tresau classificada. En Benjamí masculin, eth prumèr lòc deth pòdi siguec entar aranés, Martí Alonso, tanben deth CEGVA.
En Cadet femenin, era patinadora aranesa deth CEGVA, Alba Sastrada, se proclamèc campiona.
En Escòla femenin, era aranesa, Naia España, deth CEGVA siguec era campiona.
En Infantil A femenin, eth pòdi siguec entara aranesa, Ares Capdevila, deth CEGVA que se proclamèc campiona dera categoria.
En Júnior/Sènior A femenin, era aranesa Leire España deth CEGVA, se proclamèc subcampiona dera categoria.