Eth Conselh Consultiu de Bailes d’Aran a dat supòrt per unanimitat as allegacions der estudi informatiu deth condicionament dera N-230 des deth tunèl de Vielha enquiara termièra francesa

Deman dimars, dia 29 de mai, tàs 13:00 ores ena Deputacion de Lleida, eth secretari d’Infraestructures e Mobilitat dera Generalitat de Catalunya, Ricard Font, amassa damb eth president dera Deputacion de Lleida, Joan Reñé, eth sindic d’Aran, Carlos Barrera, e eth baile de Vielha e Mijaran, Juan Antonio Serrano, presentarà es allegacions conjuntes que formularàn es quate administracions ar estudi informatiu deth condicionament dera N-230 des deth tunèl de Vielha enquiara termièra francesa.

Aué deluns, dia 28 de mai, en Conselh Generau d’Aran a agut lòc ua naua reünion deth Conselh Consultiu de Bailes d’Aran entà analisar era prepausa des informes elaboradi pes següentes administracions: Generalitat de Catalunya, Deputacion de Lleida, Conselh Generau d’Aran e Ajuntament de Vielha e Mijaran, toti eri restacadi damb era informacion publica der estudi informatiu: “ACONDICIONAMIENTO DE LA CARRETERA N-230 DE SOPEIRA A LA FRONTERA CON FRANCIA. TRAMO BOCA NORTE TUNÈL DE VIELHA FRONTERA CON FRANCIA. CLAVE: EI2-L-0017”.

Era coordinacion des trabalhs e des informes l’a realizat eth Conselh Generau d’Aran, damb era collaboracion dera UB e UdG, e cadua des administracions s’a responsabilizat des següents trabalhs:

Conselh Generau d’Aran: Elaboracion e coordinacion der informe d’impacte ambientau.

Generalitat de Catalunya: a trauèrs deth Departament de Territòri e Sostenibilitat, era prepausa d’ua naua alternatiua as 4 presentades peth Ministerio de Fomento.

Deputacion de Lleida: a trauèrs deth sòn burèu de Servicis Tecnics, collaboracion damb era redaccion dera naua alternatiua e estructuracion der informe (allegacions).

Ajuntament de Vielha e Mijaran: informe sus es mancances der expedient informatiu deth Ministerio de Fomento e tanben er informe socio-economic en tot aportar donades fòrça mès reaus sus er impacte que representarie ath territòri es prepauses deth Ministerio de Fomento.

Eth Conselh Consultiu de Bailes a dat supòrt per unanimitat as allegacions d’aguest estudi elaborat pes quate administracions.

Deman dimars, dia 29 de mai, tàs 13:00 ores ena Deputacion de Lleida, eth secretari d’Infrastructures e Mobilitat dera Generalitat de Catalunya, Ricard Font, amassa damb eth president dera Deputacion de Lleida, Joan Reñé, eth sindic d’Aran, Carlos Barrera, e eth baile de Vielha e Mijaran, Juan Antonio Serrano, presentarà es allegacions conjuntes que formularàn es tres entitats ar estudi informatiu deth condicionament dera N-230 des deth tunèl de Vielha enquiara termièra francesa.

Aguestes allegacions conjuntes an estat frut dera grana preocupacion qu’a generat ena Val d’Aran era prepausa deth Ministerio de Fomento e aguesta preocupacion a estat tanben motiu entà comprométer er esfòrç des quate administracions entà obtier aguest informe unitari qu’, ath delà de rebáter es prepauses deth Ministerio de Fomento, presente ua alternatiua damb un impacte ambientau assumible des d’Aran en tot deishar daurida era possibilitat qu’eth Ministerio de Fomento, en ua dusau fasa, pogue melhorar era N-230 des de Pònt d’Arròs enquiara termièra damb França, en tot respectar era volentat des pòbles de Bossòst e de Les de bastir ua via segregada qu’elimine era circolacion de transpòrt pesat transfronterèr a trauèrs des sues poblacions.

Aguesta solucion dejà se traslladèc ath Ministerio de Fomento er an 2002 coma alternatiua as sues prepauses der an 1997, nauaments se li a autrejat ua còpia d’aguest document deth 2002 ath Ministerio de Fomento.

 

 

 

 

Vielha, 28 de mai de 2018

 

Conselh Generau d’Aran: Núria Sanjuan

Comments are closed.