• Pendent era session extraordinària d’aguest ens celebrada eth passat dimèrcles, es sòns membres acordèren per unanimitat balhar eth supòrt deth Conselh Economic e Sociau dera Val d’Aran ara candidatura olimpica tà 2030, basada en critèris de sostenibilitat amientau, economica, territoriau e umana, en tot considerar-la ua oportunitat unica entath desvolopament deth territòri e reclamèren unitat e responsabilitat entà separar eth debat politic dera possibilitat qu’aguesta candidatura sigue ua realitat.

• Eth Conselh Economic e Sociau dera Val d’Aran ei er òrgan de participacion d’entitats e organismes en encastre economic e sociau entara consulta, estudi e coneishement dera Val d’Aran e ei format per representants sindicaus, deth sector der ensenhament e des associacions e grèmis d’empresaris, per persones de reconeishut prestigi enes airaus economic e sociau aranés, per representants deth SOC e per representants des ajuntaments aranesi, deth Conselh Generau d’Aran atau coma per diuèrsi tecnics dera maxima institucion.

Eth passat dimèrcles s’amièc a tèrme ena sedença deth Conselh Generau d’Aran ua amassada deth Conselh Economic e Sociau dera Val d’Aran entà tractar sus era candidatura olimpica deth Pirenèu entà 2030.

Pendent era trobada, era sindica d’Aran presentèc era informacion dera qué dispause eth Conselh Generau d’Aran ath respècte d’aguesta candidatura, facilitada autant pera Generalitat de Catalunya coma peth Comitat Olimpic Espanhòl, en tot hèr un repàs cronologic d’aguestes informacions. Atau madeish, es membres deth Conselh Economic e Sociau manifestèren eth sòn supòrt ad aguesta candidatura en tot considerar-la ua oportunitat unica tara Val d’Aran, qu’a d’èster sostenible en toti es àmbits, e que, de non produsir-se, aurie de presentar-se ua alternativa entà garantir es inversions que pendent decàdes non an arribat en nòste territòri.

“Eth supòrt dera Val d’Aran ad aguesta candidatura olimpica demore nauament reforçat ” a manifestat era sindica d’Aran, Maria Vergés, que higie que “ath supòrt unanim des alcaldes e alcaldeses aranesi se i hig ara eth des sectors economics e sociaus d’Aran, conscients deth besonh qu’eth nòste territòri esdevengue ua prioritat ena agenda des administracions superiores”.

Eth Conselh Economic e Sociau dera Val d’Aran a coma objectiu possar es estudis que contribuïssen ath coneishement dera Val d’Aran e es sues potencialitats sociaus e promòir es actuacions adreçades a desvolopar-les en tot proposar accions entara incentivacion dera creacion d’ocupacion, era reactivacion deth consum, era captacion de naues empreses e inversions ena Val d’Aran atau coma era prepausa de politiques d’incentivacion dera contractacion de trabalhadors/es e entara formacion aucupacionau e prepauses de foment dera activitat economica en Aran.