Eth Conselh Esportiu dera Val d’Aran daurís es inscripcions entara Campanha d’Esquí 2018/19

Vielha, 29 de noveme de 2018.- Eth Conselh Esportiu dera Val d’Aran damb eth supòrt deth Conselh Generau d’Aran e eth Consell Català de l’Esport dera Generalitat de Catalonha e era collaboracion des ajuntaments dera Val d’Aran, organize era Campanha d’Esquí Rurau d’Iuèrn 2018/19 d’esquí aupin e snowboard entà mainatges e mainades d’entre 4 e 16 ans.

Era campanha d’esquí que s’amiarà a tèrme ena estacion de Baqueira Beret, començarà eth pròplèu 15 de deseme e acabarà eth 31 de març, damb un totau de 24 dies, repartidi entre es dissabtes e dimenges des mesi de deseme, gèr, hereuèr e març, damb 48 ores de classes practiques damb monitors titoladi e eth rèste d’ores damb acompanhants deth pròpri Conselh Esportiu. Era campanha includís eth transpòrt en autobús des des municipis de residéncia des mainatges e mainades enquiara estacion d’esquí e era assegurança obligatòria. Er orari des classes ei de 12.00 a 14.00 ores.

Entà participar ena campanha ei obligatòri amiar eth forfait de Baqueira Beret, er emplec deth casc entara practica esportiua e amiar era vestimenta deth Conselh Esportiu.

Es familhes interessades auràn de formalizar era inscripcion ena sedença deth Conselh Esportiu, enes baishi deth Palai de Gèu de Vielha, es deluns e dimèrcles de 18.00 a 20.00 ores, a on auràn d’aportar era huelha d’inscripcion ramplida, 1 fotografia recenta der alumne/a, fotocopia dera tarjeta sanitària e eth document d’ingrès sagelhat pera entitat bancaria der impòrt deth cors, fixat enguan en 350 èuros.

Comments are closed.