En aguesta carrèra se decidirà eth podium deth circuit de maximal nivèu mondiau e a on pòt estar er esportista espanhòu dera RFEDI Lucas Eguibar guanhador dera sason 2014-2015.
Eth Conselh Generau d’Aran a acuelhut era presentacion dera darrèra pròva dera Copa deth Mon de snowboard cross FIS (SBX) que se celebrarà ena estacion d’esquí dera Val d’Aran, Baqueira Beret, era dimenjada deth 19 ath 20 de març.
Er acte a estat presidit peth vicesindic d’Aran e conselhèr d’Espòrts, Luis Carlos Medina, peth president dera Reiau Federacion Espanhòla d’Espòrts d’Iuèrn (RFEDI), May Peus, peth director comerciau de Baqueira Beret, Xavi Ubeira, e peth director gerent de Baqueira Beret, Francis Coll.
Eth vicesindic d’Aran e conselhèr d’Espòrts, Luis Carlos Medina, a manifestat “entara Val d’Aran compdar damb ua pròva d’aguest nivèu ei un revulsiu entà mostrar-mos ath mon coma destinacion esportiua de maximal interès. Auer era possibilitat de disputar un campionat deth mon de SBX e ath delà era finau d’aguest campionat ei ua grana oportunitat entà hèr conéisher Baqueira Beret e tota era Val d’Aran as païsi enes quaus d’ua auta manèra non serie possibla, ath delà auem era possibilitat qu’es esportistes deth nivèu de Lucas Eguibar, Laro Herrero e Regino Fernández dera RFEDI poguen competir en casa, un aute hèt que hè mès interessant aguesta modalitat”.
Medina a hijut “sonque podem díder qu’eth Snowboard, Baqueira Beret era Val d’Aran èm de enorabona per poder acuélher aguesta pròva. Er esfòrç de totes es persones que trabalhen ac merite”.
Damb era equipa de Snowboard deth CAEI.
Un Village era mèta damb fòrça animacion
Entath diuendres d’entrenaments, eth dissabte de classificatòries e es finaus deth dimenge, ei tot dessenhat pr’amor qu’es espectadors que vagen ar eveniment gaudisquen d’ua autentica hèsta. Entad açò s’an premanit diuèrses activitats e animacions paralleles qu’auràn lòc en un Village plaçat e pè de pistes. Se poderàn trobar enquia dotze carpes de diferentes mèrques entà mostrar ath public es darrères nauetats en materiau e tanben serà ua excellenta oportunitat entà dar conéisher er inigualable entorn qu’entornege era estacion: era beutat deth païsatge, era riquesa deth patrimòni romanic e es exquisideses dera sua gastronomia, atau coma es multiples e atractiues opcions der après-ski. Des deth village se divulgaràn es diferentes rotes e lòcs entà visitar e s’aufriràn productes dera mèrca de garantia Val d’Aran, atau coma ua mòstra des plats tipics dera codina aranesa.
Atau madeish, en tot coïncidir damb era finau dera Copa deth Mon de Snowboard eth dissabte, 19 de març, aurà lòc ua naua edicion d’Era Òlhada en village (Plan de Beret) a on se poderà degustar eth plat mès tradicionau dera Val d’Aran, era òlha aranesa.
Tanben, deth 14 ath 20 de març ena Val d’Aran se realizarà era Setmana deth Caviar entà degustar aguesta jòia dera gastronomia aranesa damb es menus qu’aufrissen ueit des melhors restaurants deth territòri.
E entà méter punt finau ar eveniment, eth dimenge a compdar des 14:30 en Village se celebrarà era hèsta de clausura damb un DJ convidat e fòrça autes suspreses!
Programa
Diuendres, 18 de març de 2016
8:30 ores a 13:00 ores: Entrenaments liures SBX peth traçat de carrèra.
18:00 ores: Reünion de capitans d’equipa en Otèl Tuc Blanc
A compdar des 12:00 ores dubertura deth Village entà public damb musica, mèrques deth sector e stands de minjar
Dissabte, 19 de març de 2016
9:00 ores: Dubertura de telesères
9:30 ores: Inspeccion de pista e entrenaments
A compdar des 10:00 ores dubertura deth Village entath public damb musica, mèrques deth sector e stands de minjar
10:45 ores: Inici classificatòria masculina
13:30 ores: Inici classificatòria femenina
18:30 ores: Reünion de capitans d’equipa
Dimenge, 20 de març de 2016
9:00 ores: Dubertura de telesères
A compdar des 10:00 ores dubertura deth Village entath public damb musica, mèrques deth sector e stands de minjar
10:45 ores: Inspeccion de pista
11:45 ores: Entrenaments
12:45 ores: Inici des finaus
14:00 ores: Ceremònia de liurament de prèmis
14:30 ores: Hèsta de clausura dera Copa deth Mon en Village de mèta damb DJ
Vielha, 14 de març de 2016
Conselh Generau d’Aran: Núria Sanjuan