• Aguest contrafòrt, que non ei originau dera glèisa, presentaue ua henerècla verticau de naut en baish der an 2011 ençà que s’auie sajat d’apraiar en diuèrses ocasions sense èxit, pr’amor que tornaue a daurir-se ath pòc temps, e podie provocar un esbaussament parciau damb risc entàs persones

• Era Comission d’Auviatge dera Val d’Aran, en tot préner en consideracion qu’aguest contrafòrt deishèc d’auer ua foncion estructurau gràcies as trabalhs d’assolidament amiadi a tèrme entre es ans 1998-1999 e 2008-2010, prenec era decision de retirar era part descoesionada e bastida entre es sègles XVII-XVIII entà velhar pera seguretat des persones que visiten era glèisa

• Era actuacion ei  susvelhada pes tecnics der airau de Patrimòni deth Conselh Generau d’Aran

Eth Conselh Generau d’Aran a iniciat eth procès de desmontage deth prumèr contrafòrt dera façada septentrionau dera glèisa romanica de Santa Maria d’Arties (s. XII), declarada Ben Culturau d’Interès Nacionau (BCIN).

Aguest element, bastit entre es sègles XVII-XVIII, non ei originau dera glèisa e presentaue der an 2011 ençà ua henerècla verticau de naut en baish que, autant eth govèrn d’Aran coma er Ajuntament de Naut Aran, an sajat d’apraiar en diuèrses ocasions sense èxit, pr’amor que se tornaue a daurir ath pòc temps, possiblament degut a un mau assentament dera estructura que poirie provocar un esbaussament parciau damb risc entàs persones.

Cau destacar que, originàriament, era glèisa de Santa Maria d’Arties non dispausaue de contrafòrts, mès es grèus patologies que de ben lèu patic era bastissa e que provoquèren era deformacion des vòutes e eth desplom des murs, obliguèren a bastir ath long des sègles XVI e XIX un seguit de contrafòrts enes façades nòrd e sud dera glèisa entà recuperar era estabilitat.

Era estabilizacion definitiva dera bastissa s’artenhec gràcies as importants actuacions d’assolidament e restauracion amiades a tèrme entre es ans 1998-1999 e 2008-2010, qu’aueren coma principau objectiu dotar d’estabilitat ara glèisa per miei d’un sistèma de micropilotatge de murs e pilars. Gràcies ad aguestes actuacions, es contrafòrts exteriors deishèren d’auer ua foncion estructurau.

En tot préner en compde aguestes consideracions, era Comission d’Auviatge dera Val d’Aran, ena sua session 3 deth 25 de mai, prenec er acòrd d’amiar a tèrme ua actuacion puntuau d’assolidament d’aguest contrafòrt damb era eliminacion dera part descoesionada. Era actuacion ei susvelhada per airau de Patrimòni deth Conselh Generau d’Aran, que documentarà avientament eth demontage d’aguesta part deth contrafòrt.

Aguesta actuacion s’a amiat a tèrme damb eth finançament deth convèni marc damb era Deputacion de Lleida en ambit de reabilitacion deth patrimòni istorico-artistic.