Eth Conselh Generau d’Aran apòrte a Cáritas 10.000 èuros entà ajudar as familhes desfavorides e en risc d’exclusion sociau

Era aportacion economica deth Conselh Generau ei ua prevision que Cáritas a hèt entàs besonhs deth 2015

En aguesti darrèri ans, eth Conselh Generau d’Aran a incrementat era aportacion economica

caritas

Eth sindic d’Aran, Carlos Barrera, e eth president de Cáritas Parroquial Vielha, Pere Balagué, an signat un convèni de collaboracion entara intervencion sociau des familhes desfavorides e en risc d’exclusion sociau. Er acte a compdat tanben damb era assisténcia deth conselhèr de Salut e Benéster d’Aran, Eduardo Valdecantos e dera directora de Cáritas Parroquial Vielha, Susana Argelich.

En paraules de Barrera “autant eth Conselh Generau d’Aran coma Cáritas Parroquial Vielha èm conscients de qu’en aguesti moments cau establir un instrument que permete mitigar aguestes problematiques en Aran”.

Cáritas Parroquial Vielha ei ua entitat sense interès lucratiu fòrtament arraïtzada en Aran. Es sues activitas son de caractèr benefic e assistenciau, e constituïssen un supòrt entàs collectius mès desfavorits, un des sòns principaus compromisi e preocupacions.

Eth conselhèr Eduardo Valdecantos a soslinhat “eth Conselh Generau d’Aran, en vertut des sues competéncies, desvolope diuèrses activitats e programes en favor des collectius d’Aran afectats per desparièrs problèmes en sector des servicis sociaus. Entre aqueri programes trobam eth de balhar supòrt ad aqueri collectius damb risc d’exclusion sociau”.

Damb eth convèni signat aué, eth Conselh Generau d’Aran apòrte 10.000€ en vertut dera prevision hèta referent as activitats que desvoloparà Cáritas Parroquial Vielha pendent eth 2015.

Comments are closed.