- Era sindica d’Aran, acompanhada peth secretari generau entath Rèpte Demografic, s’amassèc damb era directora generau de Biodiversitat entà presentar-li eth Plan de Digitalizacion dera ramaderia qu’eth Conselh Generau d’Aran impulse a trauès deth Hub d’Innovacion HèPic e qu’a coma principau objectiu balhar esturments tecnologics as ramadèrs deth territòri entà melhorar eth desvolopament deth sòn trabalh e facilitar era conviuença damb era fauna sauvatja
Era sindica d’Aran, Maria Vergés, acompanhada peth secretari generau entath Rèpte Demografic, Paco Boya, mantenguec eth passat 29 de junh ua amassada damb era directora generau de Biodiversitat, Bòsqui e Desertificacion, María Jesús Rodríguez, a qui presentèc eth Plan de Digitalizacion dera ramaderia entara convivéncia damb es grani carnivors qu’eth Conselh Generau d’Aran desvolòpe a trauès deth HUB d’innovacion HèPic.
“Damb eth compromís dera direccion generau de Biodiversitat auançam entà poder desvolopar accions d’innovacion en airau dera ramaderia extensiva, quauquarren que deth Conselh Generau ençà ja auem iniciat e que pensam qu’ei indispensable entà, per un costat, balhar supòrt as ramadèrs deth territòri e, per aute, melhorar tanben era convivéncia damb era fauna sauvatja”, afirmaue era sindica d’Aran.
Eth govèrn d’Aran trabalhe de hè un temps en aguest Plan de Digitalizacion a trauès deth plaçament d’antenes de cobertura LORA en zònes remotes dera Val d’Aran que patissen ua grèu manca de connectivitat e damb er aquesiment de colièrs GPS que permeten, non sonque controlar era situacion deth bestiar, senon tanben en quin estat se trapen.
Aguest supòrt deth Ministèri de Transicion Ecologica e Rèpte Demografic s’aurà de reflexar en un convèni de collaboracion en qu’andues administracions ja trabalhen e permeterà poder desvolopar e implementar accions d’innovacion tecnologica en sector dera ramaderia e impulsar atau era bioeconomia e era diversificacion economica en territòri, atau e coma s’a començat a trabalhar damb eth projècte de gestion forestau. Un projècte en qu’era direccion generau a mostrat interès a balhar-i supòrt entà que, amassa damb era innovacion en sector ramadèr, pogue estener-se en d’auti endrets der Estat.