• A compdar de deluns, 15 de març, professionaus de diuèrsi airaus deth Conselh Generau, ajuntaments, Aran Salut e eth còs de Pompièrs d’Aran, participaràn en un curs sus intervencion en violéncia de genre e victimologia, ua formacion que forme part des accions amiades a tèrme peth govèrn d’Aran entà hèr front ara lacra que supause era violéncia de genre entara nòsta societat

Eth Conselh Generau d’Aran, a trauès deth SIAH, aufrís ua formacion entàs administracions publiques sus intervencion en violéncia de genre e victimologia, ena que participaràn 30 professionaus de diuèrsi perfils deth Conselh Generau, ajuntaments, Aran Salut e Pompièrs d’Aran.

En aguest curs se trabalharàn elements dera violéncia de genre en contèxte dera parelha des d’un punt d’enguarda psicosociau e culturau. Se tractaràn es fondaments e estructuracion d’aguest tipe de violéncia, atau coma es sequèles e era psicopatologia associada ath damatge. Es participaires trabalharàn diferents esturments aplicadi ara intervencion damb victimes adultes, en tot formar-se en aguest airau tant important.

“Entath govèrn deth Conselh Generau d’Aran aguest ahèr ei de vitau importància e, per aquerò, trabalham entà amiar a tèrme ua sèria d’accions en matèria de formacion, prevencion e de coordinacion damb toti es estaments tà hèr front ara lacra que supause era violéncia de genre e auançar entà ua societat mès justa e igualitaria”, afirmaue era sindica d’Aran, Maria Vergés.