• Era pròplèu setmana, damb motiu dera celebracion dera Hèsta d’Aran, eth Conselh Generau d’Aran a organizat tot un seguit d’actes culturaus, institucionaus e de léser entà celebrar eth 17 de junh e apropar ara ciutadania deth territòri aguesta hèsta que commemòre era recuperacion dera maxima institucion aranesa

Eth govèrn deth Conselh Generau d’Aran a premanit ua sèrie d’actes entà celebrar era Hèsta d’Aran eth 17 de junh, en tot commemorar atau era recuperacion dera maxima institucion aranesa.

“Deth govèrn deth Conselh Generau d’Aran ençà auem er objectiu de méter en valor un dia tant important entara Val d’Aran coma ei eth 17 de junh e apropar era Hèsta d’Aran ara nòsta ciutadania, en tot hèr-les partíceps e que se poguen sènter identifiadi e ligadi ara Hèsta d’Aran” explicaue era sindica d’Aran, Maria Vergés.

Eth deluns, 12 de junh, e diuendres, 16 de junh, s’amiarà a tèrme ua visita guidada dera Casa deth Senhor d’Arròs e eth Petit Musèu dera Escòla d’Arròs, entàs 12:00h. Era visita ei de franc, mès ei de besonh confirmar assisténcia en email: acvallaran@gencat.cat.

Dijaus, 15 de junh, s’inaugurarà era exposicion “10 ans des aiguats ena Val d’Aran”. Aguest acte aurà lòc ena Glèisa de Mijaran entàs 18:00h.

Diuendres, 16 de junh, aurà lòc er autrejament des Premis Literaris de 2023 ena Glèisa de Mijaran entàs 18:00 ores.

Eth dimenge, 18 de junh, i aurà pòrtes dubèrtes en Musèu dera Val d’Aran, en Vielha, de 10:00h a 13:30h e en Ecomusèu Çò de Joanchiquet de Vilamòs de 11:00h a 14:00h.

Eth dia 17 de junh, en maitin, s’amiarà a tèrme er acte institucionau dera Hèsta d’Aran, en tot amiar a tèrme tàs 12 ores era recepcion per part dera sindica d’Aran as autoritats e convidadi ena sedença deth Conselh Generau d’Aran entà, tàs 12:30 iniciar era tradicionau desfilada de pendons amiadi pes representants de cada terçon enquiara Glèisa de Mijaran. Un còp aquiu, entàs 13:00, aurà lòc er acte institucionau enes roïnes deth Santuari de Mijaran.

Ena tarde, entàs 17:30 ores aurà lòc er espectacle familiau “Les vacances de Madame Roulotte”, a cargue dera companhia Bleda, ena Plaça d’Aran e, entà finalizar, tàs 19 ores i aurà un concèrt a cargue deth grop Ribatònics ena Plaça d’Aran.