• Era pròplèu setmana, eth Conselh Generau d’Aran convocarà un Plen extraordinari entà anonciar er autrejament dera Medalha d’Aunor deth Conselh e era resolucion deth liurament des Prèmis 17 de junh d’enguan

Eth govèrn deth Conselh Generau d’Aran a premanit ua sèrie d’actes entà celebrar era Hèsta d’Aran eth 17 de junh, en tot recuperar atau era normalitat dempús de dus ans d’actes condicionadi pera situacion sanitària.

“Deth govèrn deth Conselh Generau d’Aran ençà auem er objectiu de méter en valor un dia tant important entara Val d’Aran coma ei eth 17 de junh, que commemòre era recuperacion dera maxima institucion aranesa e deth nòste autogovèrn, e apropar era Hèsta d’Aran ara nòsta ciutadania, en tot hèr-les partíceps e que se poguen sènter identifiadi e ligadi ara Hèsta d’Aran” explicaue era sindica d’Aran, Maria Vergés, en tot híger que: “aguesta a estat tostemp era nòsta volentat mès, pr’amor dera Covid, non auíem podut aufrir un programa d’activitats mès extens enquiara”.

Eth 15 de junh, entàs 18 ores, aurà lòc era inauguracion dera Sala de Contròle d’Aran (bastissa CEI de Casau) e eth plaçament d’ua placa commemorativa a Joan Canalias pr’amor des sòns ans de servici en còs de Pompièrs d’Aran.

Eth dia 16 s’amiarà a tèrme er acte d’autrejament des Prèmis 17 de junh e des prèmis literaris ena Glèisa de Mijaran.

Eth dia 17 de junh, en maitin, s’amiarà a tèrme er acte institucionau dera Hèsta d’Aran, en tot amiar a tèrme tàs 11 ores era recepcion per part dera sindica d’Aran as autoritats e convidadi ena sedença deth Conselh Generau d’Aran entà, tàs 11:30. Iniciar era tradicionau desfilada de pendons amiadi pes representants de cada terçon enquiara Glèisa de Mijaran. Un còp aquiu, entàs 12:00, aurà lòc er acte institucionau enes roïnes deth Santuari de Mijaran.

Ena tarde, entàs 17 ores aurà lòc er espectacle familhar “Pell de gallina”, a cargue dera companhia Sac d’Espectacles, ena Plaça d’Aran, tàs 18 ores i aurà ua exibicion de quilhes a cargue dera Associacion de Quilhes de Tredòs deuant dera Sala Polivalenta de Vielha e, entà finalizar, tàs 19 ores i aurà un concèrt deth grop SongAran ena Plaça d’Aran.

Atau madeish, eth Musèu dera Val d’Aran aufrirà jornades de pòrtes dubèrtes deth dimars 14 enquia dimenge 19 de junh en orari de 10 a 13:30 e de 17 a 18 ores (e en orari de maitin sonque eth dimenge), e er Archiu Generau d’Aran aufrirà visites guidades ara Casa deth Senhor d’Arròs e eth Petit Musèu dera Escòla d’Arròs.