• Er objectiu d’aguesti Prèmis ei poder escuélher dus projèctes de recèrca enes airaus dera sciéncia, tecnologia e miei ambient e un projècte mès der airau dera comunicacion entà, dempús, aplicar-les ena Antartida
Era passada setmana auec lòc ena sedença deth Conselh Generau d’Aran era presentacion deth convèni de collaboracion entre era maxima institucion aranesa, era associacion Observatòri entara seguretat, defensa e cooperacion e era Universitat Abat Oliba entath desvolupament des “Prèmis Antartics de supòrt ara sciéncia, tecnologia, miei ambient e comunicacion”.
Aguest projècte qu’ara daurís es pòrtes ara Val d’Aran compde dejà damb fòrça ans d’experiéncia e era deth 2023 serà era XIII edicion d’expedicion antartica. Er objectiu d’aguesta convocatòria ei poder escuélher dus projèctes de recèrca enes airaus dera educacion, sciéncia, tecnologia e miei ambient e un projècte mès der airau dera comunicacion entà, dempús, aplicar-les ena Antartida. Ath delà, era collaboracion deth Conselh Generau d’Aran, a trauès deth HUB HèPic, en aguest projècte permeterà acuélher pendent uns dies as candidats seleccionadi ena Val d’Aran entà realizar un cors de capacitacion tecnica.
“Damb aguest tipe de collaboracions se reconeishen es iniciatives innovadores e es capacitats professionaus e de recèrca dera populacion d’entorns ruraus de montanha coma era Val d’Aran e, ath madeish temps, ei un reconeishement tanben a totes es persones qu’apòsten pera sciéncia, era tecnologia eth miei ambient e era comunicacion, e demòstren qu’eth trabalh constant e professionau daurís es pòrtes de naues experiéncies vitals” asseguraue era sindica d’Aran, Maria Vergés.
Aguest convèni non sonque cerque aufrir era oportunitat d’arribar a un des indrets mes luenhenc deth nòste planeta, senon que tanben cerque generar ligams de cooperacion damb aqueres bases deth Pòl Sud, autant a nivèu educatiu a trauès des centres formatius dera Val d’Aran e es bases antartiques, coma a nivèu professionau a trauès des corsi de capacitacion antartica que s’amiaràn a tèrme ena Val d’Aran a trauès de Pompièrs Emergéncies e eth Grop de Rescat Especiau de Intervencion en Montanha.
Es bases dera convocatòria entara XIII edicion des Prèmis Antartics se pòden consultar ena plana web oficiau deth projècte.
Vielha, 23 de septiembre de 2022