• Eth govèrn d’Aran aufrís aguesti corsi, adaptadi as diferents nivèus, en diuèrsi oraris e en modalitat presenciau e/o telematica (segontes eth nivèu)

• Es preinscripcions poiràn realizar-se a compdar de deman, tàs 9 deth maitin, ena web oficiau der aranés

Deman, 26 de seteme de 2023 a compdar des 09:00 ores, se dauriràn es preinscripcions online entàs corsi d’aranés 2023-2024 deth Conselh Generau d’Aran, adaptadi as diferenti nivèus.

“Aguestes classes d’aranés representen un esturment fòrça important entà mantier viua era lengua, normalizar-la e apropar-la as persones nauvengudes o aqueres que volguen ampliar es sòns coneishements”, afirme era sindica d’Aran, Maria Vergés.

Es persones que volguen se pòden inscríuer a compdar de deman tàs 9, mès rebrembam qu’es places son limitades e per orde d’inscripcion. Un còp realizada era prematricula, se receberà un corrèu electronic (entre es dies 2 e 4 d’octobre) en quau s’includirà eth numerò de compde bancari entà realizar eth pagament dera matricula e es classes començaràn a compdar deth 16 d’octobre.

Es oraris variaràn segontes eth nivèu:

• Nivèu A1 (presenciau): es dijaus de 18:00 a 20:00 ores.
• Nivèu A2 (on line): es dimars de 18:00 a 20:00 ores.
• Nivèu B1 (presenciau): es deluns de 19:00 a 21:00 ores.
• Nivèu B1 (on line): es dimars de 18:00 a 20:00 ores.
• Nivèu B2 (presenciau e online): es dijaus de 18:00 a 20:00 ores.
• Nivèu C1 (on line): es dimars de 18:00 a 20:00 ores.

Eth prètz generau dera matricula ei de 52 euròs, entath personau dera administracion eth prètz ei de 26 euròs, e era matricula serà de franc entàs estudiants empadronadi en Aran, e es persones en situacion de caumatge o jubilades. Entà totes es tarifes redusides serà de besonh aportar justificant.

Es pròves finaus s’amiaràn a tèrme en prumèra convocatòria en Vielha e Barcelona en mes de mai de 2024, e en dusau convocatòria en Vielha en seteme de 2024.

Es preinscripcions poiràn realizar-se en: https://aranes.conselharan.org/corsi-daranes/