• Pendent era amassada periodica deth Conselh Generau d’Aran damb Baqueira Beret, eth Grèmi d’Ostalaria e Mossos d’Esquadra, era sindica d’Aran a anonciat que se sollicitarà ara Generalitat acabar damb eth confinament municipau des dimenjades deuant es bones donades de COVID-19, que placen Aran coma eth territòri damb mens indèx de rebròt de tota Catalunya e en tot seguir damb er anonci que hec eth govèrn dera Generalitat de poder aplicar mesures asimetriques en foncion des donades epidemilogiques des diuèrsi territòris

Aguest maitin a auut lòc era amassada periodica entre eth Conselh Generau d’Aran, era estacion d’esquí Baqueira Beret, eth Grèmi d’Ostalaria e Mossos d’Esquadra entà coordinar accions e mesures de cara ara sason d’iuèrn e es possibles scenaris que se poirien dar.

Es accions e mesures acordades se concrèten, peth moment e ara demora dera evolucion dera situacion, en un rastrejador der Espitau Val d’Aran especific entath sector toristic qu’ajudarà ara gestion de possibles casi enes empreses e establiments, e era metuda a disposicion de dus agents civics qu’amiaràn a tèrme trabalhs d’informacion e conscienciacion enes establiments entà previer es contagis.

Eth conselhèr d’Economia, Torisme e Promocion Economica, Juan Antonio Serrano, a declarat que “deth govèrn deth Conselh Generau ençà amiam a tèrme totes es gestions e contactes possibles entà sajar de minimizar er impacte des restriccions en sector toristic aranés e trabalham entà que,  a despièch dera incertitud ena que mos trapam, era Val d’Aran pogue afrontar aguesta tempsada damb garanties”.

Ath delà, era sindica d’Aran a informat tanben que “se demanarà ara Generalitat que, deuant es bones donades de COVID-19 qu’auem auut pendent es darrèri dies, que mos placen coma eth territòri de tota Catalunya damb un menor indèx de rebròt, s’acabe damb eth confinament municipau des dimenjades e se permete ara poblacion poder desplaçar-se per tota era Val d’Aran”.