• A trauès d’Aran Salut, eth Conselh Generau d’Aran a desvolopat un model organizatiu pròpri que permeterà agilizar eth procès en Aran, un còp qu’eth Departament de Salut dera Generalitat dongue lum verda ara vacunacion massiva de tota era poblacion

• Actuaument ena Val d’Aran eth 29,5% dera poblacion totau major de 16 ans a recebut dejà era prumèra dòsi dera vacuna, e eth 9,7% deth totau a completat eth procès de vacunacion

Era campanha de vacunacion dera Val d’Aran contunhe auançant e, en aguesti moments, se vacune as grops de poblacion d’entre 60 e 69 ans damb AstraZeneca/Oxford e d’entre 70-79 ans damb Pfizer/BioNTech e damb Moderna/Lonza, atau e coma mèrque eth plan de vacunacion establit peth Departament de Salut dera Generalitat.

En aguest sens, deuant dera prevision de vacunacion massiva dera poblacion enes pròplèu setmanes, dehòra des collectius definidi que dejà se vacunen ena actualitat, eth Conselh Generau d’Aran, a trauès d’Aran Salut, a dessenhat un modèl organizatiu pròpri, que permeterà gestionar aguesta vacunacion massiva dera poblacion damb mès agilitat e proximitat, atau e coma dejà a hèt pendent aguesti mesi damb era gestion dera pandemia, en tot crear un equip transversau dedicat exclusivament ad aguest ahèr.

“Pr’amor qu’eth numèro d’abitants en Aran non ei elevat, mos auem plantejat un modèl a on es servicis sanitaris siguen proactius e contacten de forma dirècta damb era ciutadania” a manifestat era sindica d’Aran, Maria Vergés, en tot híger que “es competéncies en matèria de salut publica qu’a eth Conselh Generau, gràcies ara Lei d’Aran, permeten poder organizar-mos damb un modèl adaptat ara nòsta realitat”.

Eth sistèma sanitari aranés compde damb un equip especific de vacunacion format autant per personau sanitari coma administratiu, que se n’encuede dera administracion des dòsis e deth contacte damb es persones de forma personalizada, en tot telefonar-les entà informar sus era possibilitat de vacunar-se e reservant es cites prèvies, facilitant eth procès d’inscripcion telematic que se seguís ena rèsta de Catalunya. Aguesta vacunacion en Aran se realize en Centre de Joenessa Antara der Ajuntament de Vielha e Mijaran, e, damb era estructura establida, se pòden arribar a administrar entre 180 e 200 dòsis ath día.

Atau madeish, “en moment qu’eth numèro de dòsis qu’arriben en Aran aumenten, atau coma eth nombre de persones que volguen recéber era vacuna, aguestes donades se poirien ampliar facilment damb un dusau equip” afirmaue era sindica d’Aran e higie que “eth govèrn deth Conselh Generau d’Aran ençà èm plan satisfèts d’auer podut desvolopar un modèl organizatiu pròpri de vacunacion, que foncionarà d’acòrd damb es estrategies definides pes autoritats competentes”, afirmaue era sindica d’Aran, Maria Vergés, en tot explicar que: “en aguesti moments, era campanha de vacunacion en Aran auance en tot seguir eth Plan de Vacunacion establit peth Departament de Salut, que delimite era vacunacion a grops de poblacion concrèti. Totun, en Aran ja èm prèsti entara següent fasa d’aguest Plan, qu’ei era vacunacion masiva de tota era poblacion”.

En aguest sens, era sindica d’Aran a volut arregraïr nauament “eth compromís e er esfòrç des professionaus sanitaris d’Aran e des sòns responsables deuant d’aguesta pandèmia e, concrètament ara, dera vacunacion, especiaument auent en compde que venguem de trauessar un darrèr an fòrça complicat, qu’a tensionat eth nòste sistèma sanitari”, e a senhalat que: “ei important qu’era gent deth nòste territòri sigue conscient qu’era vacuna ei segura e qu’ei era unica airina qu’auem entà arténher era normalitat dempús d’aguesta pandèmia” rebrembaue era sindica d’Aran, qu’animaue “a totes aqueres persones qu’apertien as collectius cridadi a vacunar-se, qu’ac hèsquen”.

Cau rebrembar qu’es persones d’entre 60-69 ans interessades en vacunar-se se pòden inscríuer a trauès dera web abilitada peth departament de Salut.