657.000 € provien der èish 6 deth hons FEDER 2014-2020 entà valorizar er auviatge naturau e culturau europèu
Vielha, 3 de març de 2017.- Eth Conselh Generau d’Aran destinarà 1.592.000 € ara conservacion d’accèssi ar auviatge naturau e culturau dera Val d’Aran, que 657.000 € son provenenti des projèctes deth hons FEDER 2014-2020, entara valorizacion der auviatge naturau e culturau que permeten era sostenibilitat de destinacions toristiques en territòri. Eth pressupòst se destinarà entà apariar e recuperar pistes d’accès en airaus naturaus dera Val d’Aran.
Eth Govèrn d’Aran destinarà aguesti recorsi ara recuperacion des accèssi de Vilamòs ena glèisa de Sant Joan d’Arròs, er accès ath Saut deth Pish, er accès as Uelhs deth Joeu, er accès a Valarties, er accès ar entorn des mines Victoria e Margalida e er accès en Aiguamòg e parc Nacionau d’Aigüestòrtes.
Eth projècte deth Conselh Generau d’Aran, englobe toti es municipis dera Val e presente un conjunt d’intervencions e òbres importantes entà apariar e recuperar un conjunt de vies d’accès ath miei naturau dera Val d’Aran, mejançant un conjunt d’accions de melhores d’accèssi enes airaus naturaus destacables dera Val d’Aran, entà hèr-les visitables e accessibles toristicament.
En aguest sens, eth sindic d’Aran, Carlos Barrera, a manifestat que “eth miei naturau, ei un recors toristic de prumèr orde entara Val d’Aran pendent fòrça mesi der an, e aguest projècte s’enquadre ena linha de trabalh deth Conselh Generau d’Aran, des dera sua restitucion en 1990, e es posteriors traspassi de competéncies en torisme e miei naturau dera Generalitat de Catalonha, a trabalhat entà hèr visitables aguesti espacis e protegir-les”. Barrera a soslinhat qu’aguest projècte a d’amiar-se a tèrme damb era implicacion des ajuntaments dera Val d’Aran, proprietaris des pistes forestaus.
Era majoritat d’aguestes accions serviràn ath delà entà apraiar es importants damatges causadi pes aiguats deth 18 de junh de 2013, ena Val d’Aran e qu’encara non s’an pogut rehèr per complèt.
Era melhora d’aguestes pistes, tanben facilitarà er accès a refugis de nauta montanha coma poderien èster eth de Restanca, Colomèrs, Saboredo, o es dera Artiga de Lin e Aneto pera val dera Artiga e er itinerari d’accès ath Montlude.
