Vielha, 12 de junh de 2018.- Era estacion d’esquí Baqueira Beret e eth Conselh Generau d’Aran an renauit es sòns convènis de collaboracion entara pròplèu tempsada.

Concretaments en çò que tanh ara collaboracion entre Baqueira e eth CETEI (Centre de Tecnificacion d’Espòrts d’Iuèrn) Val d’Aran, en quant ara subvencion des forfaits de tempsada dera Pre-Tecnificacion e Tecnificacion esportiua que arreceben es joeni esquiadors, e que son subvencionadi en grana part pera estacion d’esquí aranesa.

Eth vicesindic d’Aran e conselhèr d’Espòrts Luís Carlos Medina a manifestat qu’aguesta collaboracion ei indispensable entath foncionament deth CETEI, que actuauments da activitat a esportistes en Tecnificacion e Pre-Tecnificacion esportiua.

Cau arrebrembar qu’era darrèra tempsada 34 joeni esportistes an integrat es programes formatius de Pre-Tecnificacion deth CETEI Val d’Aran, 21 esportistes d’esquí aupin, 5 d’snowboard, 5 de freeride e 3 de frestyle.

Damb un programa esportiu prepausat pes clubs aranesi, eth Centre de Tecnificacion dera Val d’Aran apòste, cada an, pera formacion ena recèrca de naui talents enes espòrts de nhèu.

Eth Centre de Tecnificacion d’Espòrts d’Iuèrn dera Val d’Aran, vinculat ara Reiau Federacion Espanhòla d’Esports d’Iuèrn (RFEDI) e ara Federacion Catalana d’Esports d’Iuèrn (FCEH), a coma objectiu ajudar ara progression de joenes promeses e survelhar pera sua formacion integrau. Es esportistes seleccionadi arreceben formacion tecnica/esportiua e academica, a mès d’un seguiment medicau/psicologic entà garantir un estat de salut adequat entara practica esportiua e ua gessuda professionau de futur.

A mès dera collaboracion damb Baqueira Beret, eth CETEI compde damb eth supòrt deth Conselh Generau d’Aran, era Diputació de Lleida e eth CSD (Consejo Superior de Deportes).