• Eth Conselh Generau d’Aran e era Associacion d’Innovacion en Territòris de Montanha, damb sedença ena Val d’Aran, an signat aguest maitin un convèni de collaboracion entath desvolopament deth Hub d’Innovacion HèPic, per miei deth quau era Associacion balharà supòrt ath Hub en diuèrsi airaus entà desvolopar accions qu’impulsen naues iniciatives entà reactivar es activitats economiques des territòris de montanha

Eth Conselh Generau d’Aran e era Associacion d’Innovacion en Territòris de Montanha an signat aguest maitin eth sòn convèni de collaboracion entà impulsar eth desvolopament deth Hub d’Innovacion HèPic.

Damb aguest convèni, eth Conselh Generau d’Aran dòte ara Associacion d’Innovacion de 35.000 € entà amiar a tèrme accions de dinamizacion e creacion de sinèrgies entre es empreses presents en HèPic, atau coma entà generar dinamiques entara ciutadania en matèria d’emprenedoria, desvolopar programes entara consolidacion e creishement d’startups e fomentar era cultura der empreniment e era innovacion enes territòris de montanha coma era Val d’Aran, entre d’auti ahèrs.

“Eth govèrn d’Aran ei pleaments comprometut damb eth desvolopament d’accions qu’ajuden a impulsar activitats economiques des territòris de montanha que, coma era Val d’Aran, an de besonh ua diversificacion economica” afirmaue era sindica d’Aran, Maria Vergés, en tot híger que: “eth supòrt que balharà era Associacion d’Innovacion a HèPic a trauès d’aguest convèni serà primordiau entà arténher es objectius deth Hub, que son fomentar eth trabalh collaboratiu, era co-creacion e er aprenedissatge, e aufrir un espaci a on generar oportunitats de negòci innovadores centrades en mon rurau”.

Era Associacion d’Innovacion en Territòris de Montanha a coma finalitat crear hilat en territòri rurau de montanha entà fomentar era collaboracion d’empresaris, emprenedors e administracion publica en encastre dera tecnologia e era innovacion, damb er objectiu de fomentar eth creishement economic en aguesti territòris, creant oportunitats entath retorn e atraccion deth talent joen e fixar poblacion enes zònes ruraus.