• Aguest convèni, peth qu’eth Ministèri dotarà damb 100.000€ annaus ath Conselh Generau, permeterà era creacion d’un marc de cooperacion entre es institucions implicades e era creacion de tres Celules d’Innovacion Rurau enes territòris de Lleida e Huesca que repliquen er actuau Hub d’Innovacion qu’impulse eth Conselh Generau

• Aguestes Celules d’Innovacion Rurau impulsaran es actuacions de besonh entà crear ua dinamica territoriau que se fonamente ena collaboracion public-privada, era innovacion e era retencion e atraccion deth talent locau

Era sindica d’Aran, Maria Vergés, e eth secretari generau tath rèpte demografic, Paco Boya, an signat aguest maitin eth convèni de collaboracion entre eth Ministèri de Transicion Ecologica e Rèpte Demografic (Miteco) e eth Conselh Generau, peth quau eth Ministèri dotarà damb 100.000€ annaus ara maxima institucion aranesa entar impuls dera innovacion territoriau. Ad aguest convèni s’i higeran tanben es Deputacions provinciaus de Huesca e Lleida entath desvolopament de cellules d’innovacion rurau en tot replicar eth Hub d’Innovacion Rurau – HèPic que desvolope eth Conselh Generau d’Aran.

Er objectiu d’aguest convèni ei era creacion d’un marc de cooperacion entre es institucions implicades e supausarà era ampliacion, consolidacion e creacion de tres Celules d’Innovacion Rurau: era Celula d’Innovacion Rurau Pirenèu-Aran (que comprenerà territòris pirenencs de Huesca e Lleida, atau coma era Val d’Aran), era Celula d’Innovacion Rurau Tèrres de Lleida e era Celula d’Innovacion Rurau dera provincia de Huesca, en tot replicar eth modèl iniciat damb eth Hub d’Innovacion HèPic. Eth marc de cooperacion propiciat peth convèni afavorirà es sinergies entre es tres celules desvolopades.

“Aguest convèni respon ara volontat compartida dera administracion der Estat, es Deputacions provinciaus e eth Conselh Generau de desvolopar un Projècte d’Innovacion Territoriau qu’abòrde era situacion creada coma conseqüéncia des naui e recents procèssi demografics qu’an afectat ara distribucion tradicionau dera poblacion en territòri e balhe responsa as naui rèptes que plantege era desigualtat territoriau generada per aguesti cambis” explicaue eth secretari generau entath Rèpte Demografic, que higie: “aguesti procèssi demografics supausen un risc de despoblacion tà un important nombre de zònes ruraus que, ath madeish còp, patissen tanben un envielhiment dera sua poblacion, vedent grèument afectades es sues possibilitats de desvolopament economic e sociau, quauquarren qu’afècte tanben ath benèster e qualitat de vida dera sua ciutadania”.

“Gràcies ad aguest convèni, que dòte ath Conselh Generau d’Aran de 100.000 € annaus, poiram impulsar es actuacions de besonh tà dinamizar era collaboracion public-privada, era innovacion e era retencion e atraccion deth talent locau” explicaue era sindica d’Aran, en tot híger que: “açò mos servirà de base entà generar projèctes transformadors que impulsen un modèl de desvolopament territoriau sostenible e reequilibrador des actuaus deficits demografics, d’infraestructures e de servicis que patissen es zònes de montanha, coma ei eth cas dera Val d’Aran”.