• Eth nau recorrut ciclable entre eth Pònt deth Lop e eth Pònt de Hèr permet auançar ena execucion deth projècte, que ja a completades quate des cinc fases previstes.

Eth Departament d’Agenda Urbana deth Conselh Generau d’Aran a anonciat era finalizacion des trabalhs de condicionament deth tram comprés entre eth Pònt deth Lop e eth Pònt de Hèr, en camin deth Regodèr, ua actuacion que permet dar per acabada era tresau fasa d’execucion deth projècte Transgarona.

Aguest nau tram a estat adaptat entath ciclotorisme e ei practicable damb bicicleta gravel e BTT, en tot ampliar un itinerari segur e de qualitat que permet ara ciutadanetat e as visitants recórrer fòrça quilomètres deth hons dera Val seguint eth cors dera Garona.

Damb aguesta incorporacion ja son executades quate des cinc fases previstes deth projècte. Eth recorrut ciclable arribe enquias proximitats deth Pònt dera Lana de Les, en tot configurar un itinerari fòrça atractiu tant des deth punt d’enguarda toristic coma esportiu.

Eth projècte Transgarona vò méter en valor era Garona coma èish vertebrador deth territòri e consolidar era cooperacion transfronterèra damb es territòris vesins deth sud de Comenge. En un futur, aguesta connexion permeterà enlaçar damb eth hilat ciclable francés e arribar en Tolosa.

Ei encara per acabar era quatau fasa deth projècte, corresponent ath tram comprés entre eth Pònt dera Lana e eth Casino de Pònt de Rei, d’ua longitud aproximativa de 3,5 quilomètres. Mentre qu’aguest tram non sigue executat, es ciclistes poderàn circular provisionaument peth bòrd dera N-230 enquia Pònt de Rei, a on poderàn repréner era cincau fasa deth camin ciclable enquiara termièra francesa, connectant damb eth camin Transgarona francés.

Eth Conselh Generau d’Aran manten eth sòn compromís damb era finalizacion deth projècte. Enes darrèri mesi s’an intensificat es gestions entà obtier nau finançament, tant en encastre estatau coma autonomic.

En aguest sens, s’a sollicitat era incorporacion dera quatau fasa ath hilat de Camins Naturaus e Verds deth Ministèri d’Agricultura e, parallèlament, se trabalhe damb era Subdireccion Generau de Territòri entà integrar-la en futurs programes de camins e sendèrs.

Entath conselhèr d’Abitatge, Agenda Urbana e Governacion, Andreu Cortés, “eth Transgarona ei fòrça mès qu’un camin ciclable. Ei un projècte estrategic que combine mobilitat sostenibla, torisme, espòrt, desvolopament economic e cooperacion transfronterèra e que constituís ua des prioritats deth Conselh Generau d’Aran”.

Vielha, 23 de junhsèga de 2026