Eth dia 27 de mai se meterà eth nòm de cadun des guanhadors espanhòus dera carrèra en cadua des 7 granes corbes deth vessant aranés deth pòrt deth Portilhon e s’inaugurarà un monolit commemoratiu
Es sèt ciclistes espanhòus guanhadors deth Tour son Federico Martín Bahamontes, Luis Ocaña, Pedro Delgado, Miguel Induráin, Oscar Pereiro, Alberto Contador e Carlos Sastre, que per orde cronologic disposaràn d’ua corba.
Vielha, 5 de mai de 2016.- Eth Conselh Generau d’Aran harà un omenatge as sèt guanhadors espanhòus deth Tour de França, laguens es actes organizadi entara 9au etapa deth Tour de França 2016 que gesserà eth dia 10 de junhsèga de Vielha-Val d’Aran.
Eth diuendres 27 de mai en un acte presidit peth sindic d’Aran Carlos Barrera, era Val d’Aran renderà aumenatge as sèt ciclistes espanhòus qu’en quauqua ocasion an guanhat eth Tour de França.
Es actes començaràn as 11 ores damb ua recepcion oficiau ena sedença deth Conselh Generau d’Aran a on eth sindic d’Aran, Carlos Barrera, aufrirà ua recepcion oficiau as guanhadors espanhòus deth Tour.
Mès tard as 12 ores, serà quan en guardader deth Portilhon se harà era inauguracion oficiau d’un monolit commemoratiu, òbra de David Garcia Ariza damb es nòms des ciclistes, qu’a eth sòn còp auràn cadun d’eri ua montjòia en cadua des sèt granes corbes deth vessant aranés dera carretèra deth Portilhon, damb eth sòn nòm e era data dera edicion en que se proclamèren vencedors deth Tour de França.
Miguel Induráin, cinc còps guanhadors deth Tour de França, a ja confirmat era sua assisténcia as actes d’aumenatge deth dia 27 de mai ena Val d’Aran, a on tanben seràn Pedro Delgado, Óscar Pereiro e familhaus de Luís Ocaña. A causa dera sua auançada edat, Federico Martín Bahamontes, eth prumèr guanhador espanhòu deth Tour de França en 1959, encara non a confirmat era sua assisténcia. Es quaus non seràn per motius estrictaments professionaus son Carlos Sastre e Alberto Contador, qu’òc an confirmat que visitaràn era Val d’Aran a fin dera sason ciclista.
Es actes deth dia 27 de mai, que feniràn damb ua visita as installacions d’Aran Park, s’enquadren enes accions qu’a començat eth Conselh Generau d’Aran e Torisme Val d’Aran, de promocion dera etapa aranesa deth Tour 2016 que gesserà de Vielha eth dia 10 de Junhsèga. Ar aumenatge deth dia 27 de mai, li seguiràn activitats organizades damb motiu deth dia internacionau dera biciclèta, eth 4 e 5 de junh; e es activitats deth madeish dia 10 de junhsèga en Vielha, a on s’amiaràn a tèrme accions qu’includissen activitats que participaràn en eth es escolars dera Val d’Aran e aficionadi ath ciclotorisme.
