-
Aguest maitin dus veïculs de Pompièrs-Emergéncies an gessut direccion entà Barcelona entà hèr a arribar ua part deth materiau sanitari, ròba d’abric e minjar que, a trauès des servicis de proteccion civila, se haran a arribar entà Ucrania, totun eth Conselh Generau d’Aran ei en contacte damb eth Consolat d’Ucraïna en Barcelona atau coma damb diuèrses organizacions umanitàries entà veir de quina forma se pòt realizar er enviament dera rèsta de materiau que se sauve
-
Pendent es tres dies qu’a auut lòc aguesta campanha, gestionada a trauès des Pompièrs d’Aran e ena qu’an participat ath torn d’ua setantia de persones volontàries, s’an remassat 30 palets d’aliments, productes d’igièna personau e d’auti productes de prumèr besonh; 100 m3 de ròba d’abric, mantes, sacs de dromir, ròba de lhèt e tovalhòles, e lèu 3.800 unitats de medicaments, materiau sanitari e infantil donat peth Conselh Generau a trauès d’Aran Salut
Aguest maitin, a trauès de Pompèrs Emergéncies, an gessut es prumèri veïculs cargadi damb eth materiau sanitari e ua petita part deth materiau de prumèr besonh remassat es dies 3, 4 e 5 de març ena campanha solidària damb Ucraïna deuant era situacion d’emergéncia que viu eth país.
“Per part deth Conselh Generau d’Aran non podem hèr mès qu’arregraïr de tot còr a totes es persones volontaries qu’an estat trabalhant aguesti tres dies, a totes aqueres persones que solidàriament an aportat era sua donacion e as Pompièrs d’Aran pera organizacion dera campanha e eth trabalh qu’an amiat a tèrme”, afirmaue era sindica d’Aran, Maria Vergés, en tot explicar que: “un còp mès, Aran a demostrat era sua grana solidaritat e auem superat totes es expectatives en aguesta campanha en solidaritat damb Ucrania”.
En totau, pendent aguesti dies s’an remassat 30 palets d’aliments, productes d’igièna personau e d’auti productes de prumèr besonh; 100 m3 de ròba d’abric, mantes, sacs de dromir, ròba de lhèt e tovalhòles, e lèu 3.800 unitats de medicaments, materiau sanitari e infantil donat per Aran Salult.
Pr’amor deth naut volum de productes e materiau artenhut, eth Conselh Generau d’Aran ei en contacte damb eth Consolat d’Ucrania en Barcelona atau coma damb diuèrses organizacions umanitàries entà avalorar de quina manèra ei melhor realizar er enviament ath long d’aguesta setmana.