Es projèctes que nèishen a iniciatiua dera comunitat educativa des escòles dera Val d’Aran e deth Departament de Cultura e Politica Lingüistica deth Conselh Generau d’Aran, consistiràn ena colleccion de condes “Petit País” e era revista setmanau digitau “Eth Tricicle”.

Vielha 15 de hereuèr de 2016.- Eth Conselh Generau d’Aran, assumirà eth còst de dus naui projèctes educatius entàs escòles dera Val d’Aran. Aguesti dus projèctes nèishen a iniciatiua dera comunitat educativa des escòles araneses e deth Departament de Cultura e Politica Lingüistica deth madeish Conselh Generau d’Aran.

Eth prumèr des projèctes consistirà en ua colleccion de condes que se diderà “Petit País”. Se tracte d’ua naua colleccion de condes en aranés que nèish entà corbir un besonh manifestat pes membres dera comunitat educativa des escòles dera Val d’Aran, amassa damb eth Centre de Recorsi Pedagogics e deth servici de Cultura e Politica lingüistica deth Conselh Generau d’Aran. Se tracte de crear, elaborar e adaptar materiau didactic e produccions literàries en aranés entà mainatges e mainades d’educacion infantila e de cicle iniciau, a fin de facilitar eth dia a dia ena escòla e hèr possible ua bona abitud de lectura, aprigondir ena estructura deth lenguatge orau, dera memòria visuau e auditiva, der ampliament de vocabulari e d’ua melhor estructuracion dera expression e comprenença orau des alumnes.

Era colleccion “Petit País”, serà formada per condes sus es hèstes tradicionaus e populares dera Val d’Aran, coma son: Era Hèira, era Castanhada, Nadau, San Vicent, Carnaval, Sant Jordi e Sant Joan, atau coma era vida quotidiana, que maugrat non èster ua hèsta, tanben serà includida.
Era colleccion va dirigida a mainatges e mainades de P-5 e de 1èr e 2au de primària, de 4 a 7 ans. Consistirà en 7 condes des hèstes e tradicions e un conde dera escòla.
Era comission de trabalh dera naua colleccion, la formaràn: Maite Bayo Busquet, Mari Carmen Forment Bustamante, Mireia Fabregat Bentz, Sandra López Pònt, Sira Ortiz Pané, Esther Palomar Domingo, María Luisa Reig Duaigües e Susana Vidal Subirà.
Er objectiu dera colleccion, ei tanben propagar era lengua veïculara en es centres educatius dera Val d’Aran, potenciar era lengua e era cultura pròpria, crear materiau complementari d’iniciacion ara lectura, potenciar eth plaser pera lectura e era lengua aranesa e trabalhar mejançant es condes des hèstes dera Val d’Aran.

Eth dusau des projèctes, consistís en ua revista setmanau en format digitau, “Eth Tricicle”, entà trabalhar notícies d’actualitat damb es alumnes des escòles de Les, Bossòst, Vielha e ZER Val d’Aran. Aguest setmanièr entà mainatges e mainades ja existís en catalan, e era traduccion deth madeish ara lengua aranesa, anarà a cargue deth Departament de Cultura e Politica Lingüistica deth Conselh Generau d’Aran.

Eth sindic d’Aran Carlos Barrera, coma maxim responsable deth departament de Cultura e Lengua deth Conselh Generau d’Aran, soslinhèc que “eth Govèrn d’Aran da tostemp eth sòn supòrt as iniciatiues dera comunitat educativa dera Val d’Aran e a tot aquerò que servisque entà melhorar er accès des mainatges e mainades araneses ara nòsta lengua, cultura e tradicions, atau coma er emplec sociau der aranés en contorn que sigue, e ena escòla en particulara”.

Aguesti dus projèctes se somen a d’autes publicacions entà mainatges e mainades ja assolidades, coma “Era Garbèra”.

Descarga era version en aranés de “El Tricicle”