• Era passada setmana, s’inicièc ua pròva pilòt damb era empresa Ixorigue, que repartic a diuèrsi ramadèrs dera Val d’Aran es sòns colièrs GPS entath cotrol automatic e gestion digitau des ramats, e qu’ath delà garantissen eth bon foncionament des dispositius en tot aufrir cobertura mobil e LORA mejançant antenes que balhen senhau en zònes damb mens cobertura
• Tot aguest trabalh s’a amiat a tèrme a trauès deth HUB d’innovacion HèPic

Era passada setmana, eth Conselh Generau d’Aran inicièc ua pròva pilòt damb era empresa tecnologica Ixorigue entà implementar era geolocalizacion ena ramaderia extensiva dera Val d’Aran.

“Deth govèrn d’Aran ençà auem constatat eth besonh qu’an es nòsti ramadèrs e ramadères de compdar damb dispositius de geolocalizacion entàs sòns ramats, que siguen foncionaus e damb bona senhau, entà facilitar atau eth sòn trabalh” afirmaue eth conselhèr de Territòri, Paisatge e Gestion Ambientau, Francés Bruna, en tot híger que: “per aguest motiu auem gestionat, a trauès de HèPic, era implementacion d’ua pròva pilòt qu’a de servir entà melhorar eth sistèma actuau, e que supause ua fòrta apòsta pera innovacion en nòste territòri”.

Hè un temps, eth Departament de Territòri, Paisatge e Gestion Ambientau e HèPic organizèren ua amassada entre es ramadèrs e diuèrses empreses tecnologiques qu’aufrien solucions ad aguest sector. Es ramadèrs se mostèren fòrça interessadi peth Ixotrack, eth colièr GPS de Ixorigue que, mejançant cobertura mobil o cobertura LORA (radio), permet controlar de forma digitau er estat deth bestiar.

Era cobertura LORA permeterà, gràcies ara installacion d’antenes en zònes mès remotes, assegurar qu’es dispositius agen melhor senhau e es animaus poguen èster localizables encara que se trapen en zònes sense cobertura mobil. Ath delà, trabalhen tanben entà poder incorporar ad aguest servici prediccions der estat der animau, ei a díder, se se trape de part, s’ei malaut o i a bèth problèma.

Pendent era darrèra setmana, pr’amor der interés deth sector en aguest dispositiu, s’inicièc era pròva pilot en tot repartir diuèrsi colièrs de pròva damb cobertura mobil e LORA e installar ua antena entà hèr pròves en Baish Aran.