-
Eth govèrn d’Aran a iniciat aguest procès participatiu damb er objectiu de conéisher es besonhs e opinions dera ciutadania en aguest encastre e coma part der estudi entà elaborar eth Plan d’Abitatge, qu’a de perméter impulsar es politiques e accions de besonh tà facilitar er accès ara viuenda
-
Ua des qüesitons importantes enes qu’eth govèrn aranés trabalhe ei tanben era d’arténher es competéncies en matèria d’urbanisme e abitatge qu’era Lei d’Aran mandate e que siguen correctaments dotades a nivèu economic, pr’amor qu’actuauments era competéncia exclusiva en matèria d’abitatge correspon ara Generalitat atau coma remèrque er Estatut d’Autonomia de Catalunya
-
Pendent era visita deth conselhèr de Territòri dera Generalitat hè pògui dies, s’acordèc crear ua taula der Abitatge entà trabalhar conjuntament, damb era implicacion des ajuntaments aranesi, entà solucionar era manca de viuenda assequibla en nòste territòri
Eth govèrn deth Conselh Generau d’Aran a iniciat un procès de participacion ciutadana entà conéisher es besonhs des aranesi e araneses en matèria de viuenda, coma part der estudi entà elaborar un Plan d’Abitatge tà cercar solucions ara problematica dera viuenda en Aran.
“Auem impulsat er estudi entà elaborar aguest Plan d’Abitatge, adaptat as critèris deth Plan Sectoriau der Abitatge dera Generalitat de Catalunya, damb er objectiu de cercar solucions as grèus problematiques que presente era Val d’Aran en aguest encastre e que reclamen solucions urgentes” afirmaue era sindica d’Aran, Maria Vergés, en tot híger que “damb aguest procès participatiu volem conéisher es besonhs e realitat qu’era ciutadania a entà poder actuar de manèra efectiva e eficaça entà, quan poscam desvolopar es nòstes competéncies, aplicar es accions de besonh entà resòler aguesta situacion”.
Eth conselhèr de Governacion, Amador Marqués, destacaue que: “a trauès d’aguest estudi, que se realize damb era collaboracion des Ajuntaments aranesi e auent en compde era opinion e besonhs dera ciutadania, se desvoloparà ua diagnòsi que permete impulsar politiques d’abitatge que melhoren era actuau situacion”.
En aguest sens, era sindica d’Aran hig que: “atau e coma trasladèrem ath conselhèr de Territòri ena sua visita era passada setmana, ei de besonh ampliar es nòstes competéncies en aguest ambit e que siguen dotades economicaments coma cau, entà desvolopar politiques que faciliten er accès a ua viuenda digna e accessible. Sense desbrembar que, atau e coma mèrque er article 137 der Estatut d’Autonomia de Catalunya, era competéncia exclusiva en matèria d’abitatge correspon ara Generalitat”.
Ena amassada mantenguda era passada setmana, s’acordèc era creacion dera Taula der Abitatge entà que Conselh Generau d’Aran e Generalitat de Catalunya trabalhen conjuntament, damb era implicacion des ajuntaments aranesi, entà solucionar era manca de viuenda assequibla en nòste territòri e abordar era grèu problematica der accès ara viuenda en Aran.
“Entath govèrn deth Conselh Generau d’Aran ei fòrça important conéisher quina ei era opinion e es prepauses des ciutadans e ciutadanes en aguest ahèr tant important, per aguest motiu les animam a toti e totes a participar en aguest procès e respóner ath formulari”, manifestaue eth conselhèr Marqués.
Se pòt participar en tot responer ath següent qüestionari: