• Era sindica d’Aran a presentat aguesta tarde era exposicion fotografica organizada peth govèrn d’Aran entà rebrembar ua des catastròfes naturaus mès terribles dera istòria recenta deth nòste territòri e entà méter en valor tanben eth trabalh desinteressat de totes es persones volontàries qu’ath long d’aqueri dies collaborèren entà palliar es efèctes des aiguats

• Era exposicion se poderà vistar ena glèisa de Mijaran prèvia resèrva entà grops pendent es pròplèu dies e a compdar deth 10 de junhsèga coma part dera aufèrta culturau der hilat de Musèus Val d’Aran ath long der ostiu

Era sindica d’Aran, Maria Vergés, a inaugurat aguesta tarde era exposicion fotografica deth Conselh Generau d’Aran sus es 10 ans des aiguats que patic eth nòste territòri era net deth 17 ath 18 de junh de 2013.

“Deth govèrn d’Aran ençà auem volut organizar aguesta exposicion entà rebrembar un des episòdis mès terribles dera nòsta istòria recenta, uns aiguats que paralizèren ara hè dètz ans es nòstes vides mès, qu’a despièch des desperfèctes e pèrtes materiaus que comportèren, treigueren tanben çò de melhor dera nòsta societat, er esperit solidari e generós des aranesi e araneses, persones volontàries de totes es edats e condicions que non dubtèren en esténer era sua man a tot aquèth qu’ac auèsse de besonh entà palliar es efèctes des aiguats”, afirmaue era sindica d’Aran, en tot híger que: “damb aguesta mòstra volem arregraïr eth trabalh desinteressat amiat a tèrme per aqueres persones que, sense demorar arren a cambi, trabalhèren desinteressadament entà ajudar as sòns vesins e vesies”.

Agusta exposicion, compausada per desenes de fotografies des efèctes der aigua e eth trabalh desinteressat des aranesi e araneses volontaris ath long d’aqueri dies, se poderà vistar prèvia resèrva entà grops pendent es pròplèu dies (en tot contactar a trauès de sindicatura@aran.org o deth 973 64 18 01) e a compdar deth 10 de junhsèga coma part dera aufèrta culturau der hilat de Musèus Val d’Aran ath long der ostiu.