• Eth govèrn d’Aran a trasladat as Ajuntaments de Vielha e Mijaran, Les, Bossòst e Naut Aran tota era informacion sus ua malautia transmetuda per mosquits, qu’actuaument a estat detectada en zònes pròplèus ara Val d’Aran e qu’afècte a oelhes, crabes e vaques

• Peth moment, es Ajuntaments de Vielha e Mijaran e Naut Aran an desistit de realizar es eveniments relacionadi damb eth bestiar enes sues Hèires Ramadères coma mesura preventiva, e es Ajuntaments de Les e Bossòst se trapen ara demora de préner ua decision en foncion de coma evolucione era situacion

Eth conselhèr de Territòri, Paisatge e Cambi climatic, Francés Bruna, s’a amassat aguest maitin damb representants des Ajuntaments des municipis enes que se celèbren es tradicionaus Hèires Ramadères (Vielha e Mijaran, Bossòst, Les e Naut Aran) entà tractar sus era realizacion d’aguesti eveniments enguan.

“Deth govèrn d’Aran ençà auem volut balhar tota era informacion qu’an es nòsti responsables deth departament d’Agricultura e Ramaderia sus un ahèr sanitari que pòt afectar ara realizacion des hèires” afirmaue eth conselhèr Bruna, en tot híger que: “pendent es darrères setmanes s’a detectat en punts pròplèus ath nòste territòri ua malautia transmetuda per mosquits qu’afècte a oelhes, crabes e vaques”.

Deuant aguesta situacion, es Ajuntaments de Vielha e Mijaran e Naut Aran an desistit de realizar es eveniments relacionadi damb eth bestiar des Hèires Ramadères coma mesura preventiva, e es Ajuntaments de Les e Bossòst se trapen ara demora de préner ua decision en foncion de coma evolucione era situacion.