Eth Conselh Generau d’Aran realizarà pendent aguest mes de seteme diuèrses òbres de mielhores d’accèssi enes nuclèus, pistes e camins en Terçon de Quate Lòcs
Es accions, aprovades peth Conselh Generau d’Aran, son:
Trabalhs complementaris deth mur dera esculhèra dera Honeria en Sant Joan de Toran, en tot completar es òbres ja realizades per Ajuntament de Canejan, era intervencion deth Conselh Generau a representat ua inversion de 3.142,57€.
En municipi de Les, eth Conselh a tornat a installar es baranes de proteccion deth pònt dera Lana, maumetudes pes aiguats de junh deth 2013. Aguesta accion a supausat ua inversion de 4.000€.
Ena amassada de seguiment des òbres previstes en convèni signat entre era Fundación Endesa e eth Conselh Generau, en mes de seteme s’iniciaràn en municipi er apariament dera pista de Portet, fòrça maumetuda coma conseqüéncia des maus ocasionadi peth collapse deth drenatge dera pista que provoquèren despreniments ena madeisha e que maumeteren era caisha deth paviment e des proteccions.
“Es accions entà amiar a tèrme son es de besonh entà dotar ara pista d’ues condicions de seguretat que permeteràn era circulacion damb garanties entàs usatgèrs en tot recuperar aguest accès a un entorn naturau fòrça valuós dant connectivitat a ua part des bòsqui de Les e Canejan” a soslinhat eth conselhèr d’Agricultura, Ramaderia e Medi Naturau d’Aran, Jose E. Arró.
Era inversion prevista d’aguestes òbres ei de 100.947,75€, arrebrembam qu’aguest finançament ven deth convèni signat entre era Fundación Endesa e eth Conselh Generau d’Aran per apariament d’infrastructures d’accès ath miei naturau.
En municipi de Bossòst, eth Conselh Generau d’Aran realizarà tres accions de mielhora de camins e accèssi:
– Mielhora deth camin de Camun. Aguesta accion consistís ena mielhora deth Camin de Camun entre eth Pònt de Hèr e eth pòble de Bossòst. En aguest camin maumetut coma conseqüéncia des aiguats deth 2013, es accions entà realizar seràn er apariament deth fèrm, redreçament deth camin en un punt e engodronar aguesta zòna afectada. Er impòrt previst dera accion ei de 12.000,00€.
– Mielhora dera pista de Margalida. Eth Conselh Generau a previst era dubèrtura deth tram mès afectat. “Era pista de Margalida a estat barrada des der an 2008, e donques, cau avalorar e fòrça qu’enes moments de crisi des administracions, eth Conselh Generau age artenhut eth finançament de besonh peth sòn apariament” a soslinhat eth conselhèr de Territòri d’Aran, Eduardo Valdecantos. Er impòrt dera accion prevista ei de lèu 22.000€, qu’atau coma era accion en camin de Camun, serà finançada mejançant eth convèni entre era Fundación Endesa e eth Conselh Generau d’Aran.
Er impòrt totau d’aguestes inversions en Terçon de Quate Lòcs serà ath torn des 150.000€.
Per un aute costat, es servicis tecnics deth Conselh Generau d’Aran redigís era prepausa dera varianta deth camin reiau entre Les e Bossòst, ath sòn pas peth tarcumèr de Bossòst, es aiguats deth 2013 afectèren grèvaments aguest tram en tot hèr a desaparéisher eth camin. Un còp se dispòse deth projècte d’aguesta varianta se procedirà ath bastiment deth nau tram de camin, eth còst deth quau serà d’uns 8.000€.
En paraules deth sindic d’Aran, Carlos Barrera, “torni a soslinhar era importància qu’en aguesti moments de dificultat economica pes administracions publiques, auer acòrds damb eth sector privat que permeten executar aguest tipe d’òbres sense dobte beneficien ath conjunt deth nòste país”.