• Aguesta iniciativa forme part dera campanha “Camins Compartits” iniciada per part deth govèrn d’Aran aguest ostiu e a coma objectiu conéisher mès sus es perfils des persones que circulen pes camins e estudiar quines autes actuacions se pòden implementar entà facilitar era conviuença entre es diferents tipes d’activitats que se pòden amiar a tèrme enes nòstes montanhes tà arténher que siguen espacis segurs e amables entà toti e totes

Eth Conselh Generau d’Aran, a trauès deth sòn departament de Torisme, lance aué ua enquèsta adreçada autant ara poblacion locau coma as visitants entà conéisher es sues abituds ara ora de circular pes camins compartits dera Val d’Aran.

“Aguesta consulta forme part dera campanha ‘Camins Compartits’, qu’auem metut en marcha aguest ostiu entà conscienciar sus era conviuença deth ciclisme, en totes es sues modalitats, eth senderisme e d’autes activitats damb diuèrsi publics enes nòstes montanhes e camins, entà arténher que siguen un espaci segur e amable entà toti e totes” asseguraue eth vicesindic e conselhèr de Governacion, Innovacion, Economia e Torisme, Amador Marqués.

A compdar de deman, s’amiarà a tèrme presenciaument aguesta enquèsta en diferents punts dera Val d’Aran, mès tanben de poirà respóner de manèra telematica a trauès d’aguest ligam.

En base as responses obtengudes per part des usatgèrs e usatgères des nòsti camins, se poirà conéisher mès sus eth sòn perfil e estudiar quines autes actuacions se pòden implementar entà facilitar era conviuença entre es diferents tipes d’activitats que se pòden amiar a tèrme enes nòsti camins e montanhes.