• Era campanha includís messatges adreçadi, principaument, as possibles agressors, compde damb materiau basic exclusiu deth Conselh (drapèus, panèus, pegasolets e samarretes), e a eth supòrt des diuèrsi municipis qu’exibiràn panèus e drapèus.

• Eth prumèr pòble en méter en marcha era campanha ei Salardú damb era celebracion dera Hèsta Major dera Santa Creu entre eth 30 d’abriu e eth 3 de mai.

• Era campanha se harà a conéisher enes hèstes majors d’ostiu de tota era Val d’Aran.

Aguesta setmana, eth Conselh Generau d’Aran a estreat era campanha “Ací mos coneishem, ací mos cuedam”, damb era que vò conscienciar ara ciutadania sus eth refús contra tot tipe de violéncia enes espacis de léser nocturn. Era campanha includís messatges de non-tolerància deuant aguest tipe de comportaments, e s’adrece, principauments, as possibles agressors, damb er objectiu de generar consciéncia e responsabilitat.

Aguesta macrocampanha cònste de sus nivèus:

• Un nivèu basic, liderat peth Conselh Generau d’Aran, que promò era campanha damb materiau generau (drapèus, panèus, samarretes e pegasolets).
• Un nivèu complementari, que s’assignarà as ajuntaments aderidi ara campanha entà que la despleguen segontes es sòns besonhs en ostiu (cada ajuntament decidirà com e a on mostrar eth materiau).

Era campanha vò trincar damb eth mite de qu’es assetjaments son part dera accion de ligar. Per aquerò se poténcien frases coma “Non ei normau tocar sense permís”, o “Se dobte, ei non”.

En tot coïncidir damb er inici dera campanha, Salardú ei eth prumèr pòble que desplegarà aguesta naua accion, damb era celebracion dera Hèsta Major dera Santa Creu, deth 30 d’abriu enquiath 3 de mai.

Ath long der ostiu, aguesta campanha se harà a conéisher enes hèstes majors dera Val d’Aran.

Cau remercar que d’autes mesures, coma eth plaçament de Punts Lila enes hèstes, a ajudat ath long des ans que pòrten en foncionament, a redusir es dades d’agressions, fòrça viatges com a conseqüéncia dera nauta preséncia d’alcoòl.

“En Conselh Generau d’Aran credem qu’aguesta campanha de sensibilizacion e conscienciacion dera non-violéncia enes espacis de léser nocturn, ei ua airina qu’ajudarà a toti es sectors dera populacion a non tolerar cap de tipe d’agression en quinsevolh hèsta”, a comentat era conselhèra de Joenessa, Igualtat e Inclusion Sociau deth Govèrn d’Aran, Maria Menis. E a hijut que: “volem qu’autant es hemnes coma es òmes gaudisquen dera hèsta en igualtat e libertat. Èm un territòri petit, a on mos coneishem en grana mesura, de manèra qu’ei mès facil poder identificar a bona part des agressors. En aguest sens, ei fondamentau era collaboracion de toti entà hèr des espacis de léser nocturn, espacis segurs”.

Vielha, 30 d’abriu de 2026