• Es Pompièrs d’Aran, en collaboracion damb eth departament de Miei Ambient deth Conselh Generau e damb era unitat GRAF de Bombers de la Generalitat, amien a tèrme pendent aué e deman ua crema controlada en Basuen entà previer possibles incendis e recuperar peisheus

Eth Conselh Generau d’Aran a organizat, a demana der Ajuntament de Bausen, ua crema tecnica ena part nauta deth pòble. Pendent es dies d’aué e deman, es Pompièrs d’Aran, en collaboracion damb eth departament de Miei Ambient e era unitat GRAF de Bombers dera Generalitat amiaràn a tèrme es trabalhs de crema des espiarrassi e contròl deth huec.

“Er objectiu d’aguesta crema tecnica ei evitar possibles incendis ath còp que recuperam es nòsti peisheus”, explicaue eth conselhèr de Territòri, Paisatge e Miei Ambient, Francés Bruna, en tot híger que “pendent es darrèri ans, auem perdut fòrça des prats que, tradicionaument, auien estat destinadi ara ramaderia, e ara ei important realizar accions coma aguesta entà auer un entorn suenhat e segur”.

En aguesta accion participen ath torn de 25 efectius de Pompièrs d’Aran e GRAF de Bombers. Es Pompièrs dejà auien amiat a tèrme dies endarrèr trabalhs de perimetratge e seguretat dera zòna entà auer controlada era actuacion.