• Er objectiu deth govèrn aranés damb era reactivacion d’aguest ens creat pendent era legislatura de 2007-2011 ei eth d’establir ua comunicacion dirècta e bidireccionau damb eth teishit empresariau aranés, en tot crear un espaci de debat e contacte entre er airau public e privat

Pendent eth plen en session ordinària dera maxima institucion aranesa celebrat aguest maitin, s’a aprovat per unanimitat eth nomenament des representants en Conselh Economic e Sociau d’Aran, un des darrèri passi entà méter en foncionament aguest organisme qu’a coma principau objectiu establir ua relacion dirècta e bidireccionau entre eth Conselh Generau d’Aran e eth sector privat deth territòri.

“Eth Conselh Economic e Sociau se creèc pendent era legislatura de 2007-2011 e d’alavetz ençà non s’auie tornat a amassar” explicaue era sindica d’Aran, Maria Vergés, en tot híger que: “entath govèrn deth Conselh Generau ère primordiau recuperar aguest ens, pr’amor qu’ei un organisme fòrça important de debat e de contacte damb es empreses que conformen eth teishit economic dera Val d’Aran, e pensam qu’ei vitau recuperar ua comunicacion dirècta e bidireccionau damb eres, especiaument auent en compde era situacion economica e sociau ena que mos trapam dempús dera pandèmia”.

Aguest ens, que se demore que se pogue amassar per prumèr còp enes pròplèu setmanes, servirà entà fomentar era collaboracion e comunicacion entre er airau public e privat en totes aqueres qüestions a on eth consens e eth trabalh conjunt poguen favorir era prenuda de decisions tà fomentar era promocion economica en Aran.