-
A trauès deth Programa de supòrt tath renauiment tecnologic deth departament de Salut dera Generalitat, Aran Salut a recebut un ajut entath cofinançament de diuèrsi equipaments sanitaris e aparelhs medicaus que demorauen en estat d’obsolescéncia tecnologica de hè temps
Eth Conselh Generau d’Aran renauirà diferents equipaments tecnologics der Espitau Val d’Aran dempús qu’Aran Salut age recebut era subvencion deth Departament de Salut dera Generalitat de Catalunya entath cofinançament d’inversions en renauiment d’equiament sanitari e aparelhs medicaus en marc deth Programa especific de supòrt ath renauiment tecnologic (PERT).
“Ath long d’aguesti darrèri ans, deth govèrn deth Conselh Generau d’Aran ençà auem amiat a tèrme importantes inversions en equipaments e aparelhs der Espitau Val d’Aran qu’èren dejà obsolets e ara, damb aguesti ajuts PERT poderam acabar de renauïr tot er aparatatge que demoraue per cambiar-se” afirmaue era sindica d’Aran, Maria Vergés.
Atau donc, damb aguesta inversion s’adquiriran tres desfibriladors, un electrobisturí, un cardiotocògraf, dues tors d’endoscòpia polivalentes, un ecògraf portatil e ua tor de laparoscòpia de cirurgia generau.
Cau rebrembar qu’enes darrèri tempsi s’an aquerit tanben un TAC de darrèra generacion, un mamograf, un telemando e un aparelh d’anestesiologia, equipaments qu’ère fòrça de besonh renauir pr’amor dera sua antiquitat entà assegurar era qualitat assistenciau que se balhe en Espitau Val d’Aran.