-
Damb aguest convèni se realizaràn es estudis e trabalhs d’enginheria de besonh entà amiar a tèrme un projècte de climatizacion urbana de heired e calor tà subministrar energia a diuèrsi equipaments e edificis de Vielha per miei dera energia geotèrmica
-
Eth Conselh Generau d’Aran, per miei d’aguest projècte e deth plan de gestion forestau entar aprofitament dera biomassa, apòste peth foment des energies renovables, en tot trabalhar ena eliminacion dera peada de carbòni
Era sindica d’Aran, Maria Vergés, e eth director der Institut Cartogràfic i Geològic de Catalunya (ICGC), Jaume Massó, an signat un convèni de collaboracion entà impulsar era geotermia ena Val d’Aran.
En concrèt, aguest convèni establís es pactes entà realizar es estudis e trabalhs d’enginheria de besonh entà impulsar eth projècte “Vielha Smart Multi-RES micro DHC grid”, un futur projècte der hilat de climatizacion urbana de heired e calor entà subministrar energia a diuèrsi equipaments e edificis de Vielha per miei d’ua ibridacion d’energia geotermica damb d’autes hònts renovables (coma era biomassa locau o era energia solar) que prebotje eth Conselh Generau d’Aran.
“Deth govèrn d’Aran ençà apostam, des deth prumèr moment, per impuls des energies renovables entà disminuir er usatge e dependéncia des energies fossils e contribuir atau ara eliminacion dera peada de carbòni e trabalhar pera sostenibilitat” afirmaue era sindica d’Aran, Maria Vergés, en tot híger que: “actuaument, ath delà aguest projècte de District Heating, qu’ei previst que dongue cobertura ath Palai de Gèu de Vielha, er Institut d’Aran e ua bastissa de viuendes particulars dera madeisha zòna, trabalham tanben en un plan de gestion forestau que mos a de perméter profitar es nòsti recorsi entà generar biomassa, ath viatge que suenham es nòsti bòsqui e les hèm mès resilients ath cambi climatic e as incendis forestaus”.
Era geotermia ei un recors geologic e ua hònt d’energia renovable, neta e autoctòna, qu’amassa damb era rèsta d’energies renovables ajude a assolir un modèu energetic mès sostenible, basat ena eficiéncia energetica, er impuls der autoconsum, era reduccion des emissions de CO2 e era luta contra eth cambi climatic.
Eth convèni damb er ICGC tanben prevé collaborar entà cercar projèctes finançadi per hons europèus enes que se pogue inclodir eth projècte “Vielha Smart Multi-RES micro DHC grid” coma cas demostratiu; eth dessenh d’ua aplicacion entà poder realizar calculs preliminars d’installacions geotermiques entà prebotjar era sua implementacion en tot eth territòri, e er impuls d’accions de divulgacion e comunicacion entà prebotjar er usatge des energies renovables per miei d’exposicions, jornades o espacis interactius, entre es quaus, era implementacion d’un centre d’interpretacion des renovables.
Damb aguest convèni, er ICGC seguís auançant en desvolopament deth projècte GeoEnergia, qu’a coma objectiu melhorar eth coneishement des recorsi geotermics entà valorar eth sòn potenciau e fomentar-ne eth sòn usatge a escala urbana.