Eth Govèrn deth Conselh Generau d’Aran a signat damb es AMPEs des pòbles d’Arties, Salardú, Les, Gessa e Bossòst es convènis pes quaus se subvencione es minjadors escolars. “Ei volontat deth Govèrn d’Aran afavorir era existéncia des petites escòles en toti es municipis dera Val d’Aran e mantier eth servici de minjador escolar e d’atencion as mainatges pendent er orari interlectiu de meddia en tot contribuir atau ara conciliacion laborau des familhes”, segontes a manifestat era conselhèra de Torisme e Desvolopament Economic d’Aran, Anna Díaz.

Ath delà, Díaz, a hijut “er objectiu d’aguesti convènis ei sajar d’igualar en totes es escòles dera Val d’Aran eth prètz deth servici deth minjador escolar, eth còst supòrten directament es familhes”.

Un an mès, eth Govèrn d’Aran tanben a signat un convèni damb totes es escòles dera Val d’Aran e er Institut d’Aran entà contunhar finançant eth transpòrt extraescolar “pensam qu’ei fòrça important garantír qu’es alumnes poguen hèr gessudes d’aprenedisatge dehòra dera Val d’Aran e entenem que pera situacion geografica ei important facilitar as escòles es mieis de besonh”, a soslinhat era conselhèra Díaz.

Es viatges extraescolars son totes es gessudes laguens o dehòra dera Val d’Aran, que realize eth centre pendent eth cors escolar.