Vielha, 9 de hereuèr de 2018.- Eth Conselh Generau d’Aran e era enterpresa ALSA refortilhen pendent eth mes de hereuèr eth servici de transpòrt public intèrn ena linha de Les entà Baqueira Beret.

Era enterpresa ALSA a previst refortilhar eth servici abituau dera linha damb un autobús mès entàs 8:00 ores deth maitin, en Vielha e Mijaran, qu’ei a on abituauments enes ores punta s’aumplissen es veïculs entà pujar en direccion entà Baqueira, e atau evitar qu’age passatgèrs qu’agen de demorar ara arribada deth següent autobús. Era madeisha operacion se repetirà en orari de baishada des de Baqueira entàs 16:00 ores.

Era prevision deth Govèrn d’Aran e dera enterpresa ALSA, ei abilitar aguest autobús complementari quan sigue de besonh deuant dera demanda deth servici.

Cap arrebrembar qu’aguest renfortiment deth servici intèrn deth transpòrt public intèrn dera Val d’Aran ja se metec en foncionament pendent eth pònt dera Purissima e en Nadau passat, quan ALSA abilitèc 19 servicis refortilhadi en aqueres dates.

Era informacion sus aguest renfortiment apareisherà enes pantalhes informatives des parades entà auer informadi as viatgèrs se se produsís quauqua incidéncia.

Era conselhèra de Torisme d’Aran, Anna Díaz, expliquèc que “deuant dera prevision d’ua nauta aucupacion toristica pendent eth mes de hereuèr ena Val d’Aran, s’a decidit recuperar aguest renfortiment dera linha intèrna de transpòrt per melhorar eth servici que s’aufrís a visitants e usatgèrs abituaus que cada viatge utilizen mès aguest servici “.