• Enguan, eth Conselh Generau d’Aran, gràcies ara dotacion economica dera ACA, invertirà mès de 700.000 euròs ena melhora des depuradores dera Val d’Aran, e ua part importanta d’aguesta inversion anarà destinada ar estudi d’installacion de plaques fotovoltaiques enes depuradores de Bossòst, Les, Naut Aran e Vielha entà melhorar atau era sua eficiéncia energetica

Eth Conselh Generau d’Aran, gràcies ara dotacion economica annau dera Agéncia Catalana der Aigua (ACA), invertirà enguan 714.172 euròs ena melhora des Estacions Depuradores d’Aigües Residuaus (EDARS) dera Val d’Aran.

Lèu eth 50% d’aguesta inversion se destinarà as estudis d’installacion de plaques fotovoltaiques enes depuradores de Bossòst, Les, Naut Aran e Vielha, en tot cercar atau era melhora dera eficiéncia energetica d’aguestes installacions.

Es hons restants, s’invertiràn en diferentes accions coma era substitucion deth tamís dera depuradora d’Arròs, es sistèmes de seguretat d’inondacions soterrat en Bossòst e Les, era installacion d’un tamís d’alheujaments en Naut Aran o era motorizacion des valvules d’aeracion, entre d’autes.