Eth Conselh Generau inície era sua campanha toristica “Val d’Aran, era tèrra des mil colors”

  • Pendent tot eth mes d’octobre, eth govèrn deth Conselh Generau, a trauès de Foment Torisme Val d’Aran, a organizat un ampli ventalh d’activitats entà gaudir dera tardor ena Val d’Aran, en tot conéisher era sua gastronomia, cultura e miei naturau

Eth Conselh Generau d’Aran, a trauès deth sòn departament de Torisme, a organizat ua complèta e variada prepausa d’activitats que complète era agenda dera tardor aranesa, damb era collaboracion de quauques empreses e restaurants deth territòri. Des dera observacion dera natura enquiara degustacion dera gastronomia autoctòna, totes eres animen a gaudir dera estacion mès colorida dera Val d’Aran.

“Era tardor ei ua sason damb moltes possibilitats, non sonque pr’amor que mos aufrís uns paisatges espectaculars, senon tanben perque era meteorologia encara permet gaudir d’activitats coma eth senderisme o eth ciclisme pendent uns mesi mès”, afirme eth conselhèr d’Economia, Torisme e Promocion Economica, Juan Antonio Serrano, en tot híger que: “mos cau profitar es recorsi qu’aufrís Aran pendent aguesti mesi de tardor, enes qu’abituaument non recebem un elevat nombre de visites, e pensam qu’aguesta campanha, que dejà amièrem a tèrme er an passat, ei ua bona oportunitat entà diversificar era nòsta aufèrta toristica e atrèir a mès persones”.

Pera sua part, eth tanben conselhèr d’Economia, Torisme e Promocion Economica, Josep Canut, destaque que: “deth govèrn deth Conselh Generau d’Aran ençà auem trabalhat damb diferents empreses deth territòri entà aufrir tot tipe d’activitats, coma gessudes entà víuer era brama deth cèrvi, rotes entà méter en valor eth nòste auviatge o passejades peth bòsc damb expèrts micologics entà conéisher mès sus eth mon des misharnons, entre fòrça d’autes” e hig: “ath delà, diferents restaurants aranesi an premanit menús especiaus centradi enes productes de tardor que se poiràn degustar pendent totes es dimenjades deth mes”.

Consulta eth huelheton entà conéisher totes es activitats:

Comments are closed.