Eth Conselh Generau lance era campanha toristica “Aguest ostiu, gaudís dera Val d’Aran en familha”

  • Aguesta iniciativa arribe, segontes afirmen es conselhèrs d’Economia, Torisme e Promocion economica, Juan Antonio Serrano e Josep Canut, dempús d’un intens trabalh per part de Foment Torisme Val d’Aran entà afrontar dera milhor forma possible era sason d’ostiu dempús dera crisi deth COVID-19

Eth Conselh Generau d’Aran inície aué era campanha “Aguest ostiu, gaudís dera Val d’Aran en familha”, ua iniciativa familhar de promocion dera destinacion, qu’en sòn lançament coincidís damb eth Dia Internacionau des Familhes.

“Des der inici dera crisi deth COVID-19, en Foment Torisme Val d’Aran auem trabalhat intensament entà decidir quina estrategia podie èster era milhor entà afrontar aguest ostiu”, afirme eth conselhèr d’Economia, Torisme e Promocion Economica, Juan Antonio Serrano, que hig: “pensèrem que serie interessant fomentar aguest torisme familhar, de mès longa durada e en tot favorir un major consum. Damb aguesta propòsta s’aufrís lotjament gratuït entara mainadèra de mens de 12 ans e diuèrsi auantatges e descompdes en activitats entàs mès petits”.

Pera sua part, eth conselhèr Josep Canut insistís en que: “auem per deuant un gran rèpte dempús dera crisi deth COVID-19, e des deth govèrn deth Conselh Generau d’Aran volem afrontar-lo amassa damb eth conjunt dera ciutadania aranesa a trauès des procèssi de debat e grops de trabalh dera estrategia Aran Accion 20/30”.

Era campanha “Aguest ostiu, gaudís dera Val d’Aran en familha”, que serà vigent enquiath 13 de seteme, ei ua iniciativa amiada a tèrme peth Patronat amassa damb diuèrsi empresaris dera Val d’Aran, des sectors de lotjament e activitats ar aire liure. Entà informar-ne s’a elaborat un huelheton damb es donades des diferents establiments collaboradors.

Natura e aventura

Ena Val d’Aran er entorn naturau acompanhe e era aufèrta de lotjament ei variada, damb un bon nombre d’otèls, apartotèls, ostaus, campings, refugis e cases ruraus adaptades entad aguest public. Era propòsta d’activitats tanben ei diuèrsa e entà totes es edats.

Era destinacion ei perfècta entà descorbir es secrèts deth paisatge de montanha, gaudir des rius, lacs e sauts d’aigua, hèr un picnic en miei deth bòsc, passejar o pedalar pes mès de 550 km de camins senhalizadi, o practicar espòrts ar aire liure coma eth rafting o es vies ferrates, entre d’autes.

Ath delà, eth territòri compde tanben damb un parc d’aventura enes arbes, Naturaran, damb diferents circuits entàs mainatges e mainades, e un gran parc de fauna, Aran Park, plaçat ena natura e que permet conéisher es animaus e era biodiversitat pròpria dera nauta montanha.

Comments are closed.