Era seccion femenina de Barcelona repetís eth sòn stage ena Val d’Aran en tot entrenar en camp de fotbòl de Naut Aran

Era Val d’Aran pòrte bèri ans en tot arrecéber era visita de diferentes equipes esportius d’elèit pendent era sason d’ostiu, entre eri eth prumèr equip blanc e blu

Eth conselhèr de Governacion d’Aran, Frances Medan, a arrecebut ara plantilha deth femenin deth RCD Espanyol que se trapen ena Val d’Aran pendent tres dies entà realizar part dera sua pretemporada d’ostiu.

Er equip catalan ei eth dusau an que realize ena Val d’Aran eth sòn stage, en tot lotjar-se en Vielha e entrenar en camp de fotbòl de Naut Aran. Des deth club son satisfèti pes condicions qu’aufrís era Val d’Aran a nivèu d’installacions entà poder desvolopar era sua pretemporada.

“Des deth govèrn deth Conselh Generau volem arregraïr qu’er equip femenin deth RCD Espanyol de Barcelona agen escuelhut per dusau an era Val d’Aran entà començar a premanir era sua sason e les desiram fòrça exits”, a manifestat eth conselhèr de Governacion, Frances Medan.

Era Val d’Aran s’a anat plaçant enes darrèri ans coma era destinacion preferida per diuèrses equipes d’elèit de diferenti espòrts entà realizar part dera sua preparacion fisica mesi abans de començar era sason.