Eth Conselh Generau torne a organizar en seteme eth Mes deth Benestar ena Val d’Aran

  • Per dusau an consequtiu, damb er objectiu de dinamizar eth mes de seteme e trabalhar entà atreir un torisme interessat peth benestar e era natura, Foment Torisme Val d’Aran, amassa damb diferents professionaus d’aguest airau deth territòri, a organizat un ampli ventalh d’activitats beneficioses entara salut coma ioga, taichí, passejades o talhèrs de codina saludable, entre d’autes

Un an mès, entath mes de seteme eth Conselh Generau d’Aran, a trauès de Foment Torisme Val d’Aran, a organizat ua complèta agenda damb mès de 40 activitats gratuïtes centrades en benestar, damb er objectiu de consolidar Aran coma un endret beneficiós entara salut, perfècte entà agarrar fòrces e renauir còs e ment.

“Deth govèrn d’Aran ençà trabalham entà aufrir as nòsti vistants tot tipe d’activitats entà que poguen gaudir ath maxim dera Val d’Aran” explicaue eth vicesindic e conselhèr d’Economia, Torisme e Promocion Economica, Juan Antonio Serrano, en tot híger que: “dehòra des mesi mès fòrts der ostiu contunham trabalhant, e volem dinamizar eth mes de seteme en tot demostrar qu’èm un territòri saludable, damb un entorn net e descongestionat e ua amplia aufèrta de professionaus qu’aufrissen tot tipe d’activitats e terapies naturaus”.

Compdant damb er entorn mès saludable coma scenari, pendent eth mes que ven s’amiaràn a tèrme sessions de iòga, biogroove, talhèrs de codina sana, meditacion, e passejades entà conectar damb era natura, entre d’autes activitats.

“Er entorn naturau dera Val d’Aran aufrís infinites possibilitats e pensam que, ara mès que jamès, era gent ei conscient dera importància dera salut física e mentau”, apunte eth conselhèr d’Economia, Torisme e Promocion Economica, Josep Canut: “damb aguest mes deth benestar complementaram es activitats fisiques, de relaxacion e connexion damb un madeish, damb es nòsti paisatges, gastronomia e auviatge culturau entà incrementar es resultats d’aguesta experiéncia unica”.

Aguesta iniciativa se complemente damb ua amplia aufèrta d’otèls e restaurants que, per miei des sòns servicis e infraestructures, cèrquen tanben eth benestar des sòns clients.

 

 

Comments are closed.