Eth Conselh impulse eth Plan Especiau Urbanistic deth riu Garona pendent era visita dera presidenta dera CHE

seteme 13, 2019 Govèrn

  • Entre d’auti ahèrs, enes amassades mantengudes damb era CHE s’a parlat der estat dera Ribèra de Valarties dempús deth botàs de tèrra der an passat

  • Aguesta visita servís entà estrénher relacions e auer ua comunicacion dirècta entre es dues administracions

Era Val d’Aran a arrecebut era visita dera presidenta dera Confederacion Idrografica der Ebre (CHE), María Dolores Pascual, e quauqui des sòns tecnics. Eth sindic d’Aran, Francés Boya, que corsèc era invitacion, s’a mostrat fòrça satisfèt d’acuélher aguesta visita, qu’ei era prumèra dera CHE ath nòste territòri dempús des aiguats de 2013.

Pendent era tarde de dijaus, 12 de seteme, eth sindic e conselhèrs d’Aran, era presidenta dera CHE e diuèrsi tecnics deth Conselh e era Confederacion, acompanhadi per alcalde de Naut Aran, era presidenta dera EMD d’Arties e Garòs e d’auti representants deth pòble, visitèren era Ribèra de Valarties entà comprovar er estat deth botàs de tèrra deth mes de mai de 2018.

Se visitèren tanben diferents punts dera conca deth riu Garona ath sòn pas per Casarilh, Es Bòrdes o Les, entre d’auti, a on tanben sigueren presents es alcaldes.

En maitin de diuendres s’an mantengut ua amassada de trabalh entre eth Conselh e era Confederacion e ua auta a on tanben an assistit es alcaldes des municipis aranesi. S’an tractat ahèrs coma era redaccion deth Plan Especiau Urbanistic deth riu Garona, qu’afectarà ara regularizacion des càmpings, es diferentes intervencions realitzades dempús des aiguats de 2013 o era coordinacion entre era CHE, era Agéncia Catalana der Aigua (ACA) e eth govèrn d’Aran, entre d’auti.

Entara Confederacion Idrografica der Ebre, segontes paraules dera sua presidenta, aguesta a estat ua visita “fòrça important pr’amor dera especificitat dera conca deth Garona e era Val d’Aran”, e servís “entà estrénher relacions e auer ua comunicacion dirècta entre es dues administracions”.

Pera sua part, eth sindic d’Aran, a afirmat qu’en aguesta visita “per un costat s’an revisat quauqui ahèrs qu’afècten ara seguretat coma ei eth cas dera Ribèra de Valarties, e per un aute, s’a impulsat eth Plan Especiau dera Garona que parlarà des risqui e aprofitaments deth Garona e tanben de coma méter en valor aguest element tan important tath país coma ei eth riu”.

Comments are closed.