Eth conselhèr d’Espòrts d’Aran ena presentacion dera finau dera Copa deth Mon de Snowboard Cross (SBX) qu’acuelherà Baqueira Beret

Eth dia 9 de març, se presentarà ena sedença deth Conselh Superior d’Espòrts (CSD) de Madrid era finau dera Copa deth Mon de SBX.

Era estacion d’esquí dera Val d’Aran, Baqueira Beret, acuelherà aguesta finau eth pròplèu dia 20 de març.

Diuèrses activitats ludiques, culturaus e gastronomiques, atau coma un animat village ena estacion d’esquí aranés acompanharàn ara competicion pendent tota era dimenjada.

 

DSC_0045

 

Eth vicesindic d’Aran e conselhèr d’Espòrts, Luis Carlos Medina, assistirà deman, dia 9 de març, ara presentacion dera finau dera Copa deth Mon de SBX qu’aurà lòc ena sedença deth Conselh Superior d’Espòrts (CSD) en Madrid. Er acte serà presidit peth director generau deth CSD, Óscar Graefenhain, eth president dera Reiau Federacion Espanhòla Espòrts d’Iuèrn (RFEDI), May Peus, eth director Comerciau de Baqueira Beret, Xavi Ubeira, e er actuau campion dera Copa deth Mon de SBX 2014-15, Lucas Eguibar, dera RFEDI.

Era celebracion d’aguest eveniment internacionau de prumèr nivèu aurà lòc en Baqueira Beret es dies 19 e 20 de març.

Diuèrses activitats ludiques, culturaus e gastronomiques, atau coma un animat village ena estacion d’esquí aranés acompanharàn ara competicion pendent tota era dimenjada.

Pera sua espectacularitat, era finau dera Copa deth Mon de Snowboard Cross FIS 2016 ei un des eveniments mès demoradi pes amants der espòrt d’iuèrn. Eth circuit s’a traçat ena naua pista de Baqueira Beret que pòrte eth nòm de Boardercross, estreada justaments aguest iuèrn, e qu’ei plaçada ena zòna deth Blanhiblar en airau de Beret.

En Baqueira arribaràn es melhors deth circuit SBX FIS 2016, tant òmes coma hemnes, entà decidir es campions absoluts que se portaràn eth “globo de cristal”. Ena organizacion der eveniment collaboren, ath delà dera estacion Baqueira Beret, eth Conselh Superior d’Espòrts (CSD), era Reiau Federacion Espanhòla d’Espòrts d’Iuèrn (RFEDI), era Federacion Catalana d’Espòrts d’Iuèrn (FCEH), eth Conselh Generau d’Aran, er Ajuntament deth Naut Aran e eth Conselh Catalan de l’Espòrt.

 

160212-Entrenos-SBX#18ABA9F

 

Era equipa dera RFEDI, un des mès potenti, compde damb era participacion de Lucas Eguibar, campion dera Copa deth Mon 2014-2015, ath delà deth càntabre Lalo Herrero e der andalós Regino Hernández. Es tres s’entrenèren eth passat mes de gèr ena estacion aranesa damb eth tecnic de SBX dera RFEDI, Israel Planas qui a arregraït eth supòrt dera estacion e deth Conselh Generau d’Aran e es facilitats pes entrenaments dera equipa.

Er eveniment ei ua excellenta oportunitat entà hèr conéisher er inigualable entorn qu’entornege era estacion: era beutat deth païsatge, era riquesa deth patrimòni romanic e es exquisideses dera sua gastronomia, atau coma es multiples e atractiues opcions der après-ski. Des deth village (plaçat en Plan de Beret) se divulgaràn es diferentes rotes e lòcs entà visitar e s’aufriràn productes dera marca de garantia Val d’Aran, atau coma ua mòstra des plats tipics dera codina aranesa.

Atau madeish, en tot coïncidir damb era finau dera Copa deth Mon de Snowboard eth dissabte, 19 de març, aurà lòc ua naua edicion d’Era Olhada en village (Plan de Beret) a on se poderà degustar eth plat mès tradicionau dera Val d’Aran, era olha aranesa.

Per un aute costat, des deth 14 ath 20 de març ena Val d’Aran aurà lòc era Setmana deth Caviar per degustar aguesta jòia dera gastronomia aranesa damb es menus qu’aufrissen ueit des melhors restaurants deth territòri.

E entà méter punt finau ar eveniment, eth dimenge a compdar des 14:30 en village se celebrarà era hèsta de clausura damb un DJ convidat e fòrça d’autes suspreses!

 

Vielha, 8 de març de 2016

 

Conselh Generau d’Aran: Núria Sanjuan

 

Comments are closed.