• Aymar batièc aguesta naua rota coma Canal de Les, en aunor ara sua localitat natal dera Val d’Aran, Les.
Eth passat mes de junhsèga eth freerider aranés, Aymar Navarro Combalié, viatgèc a Buenos Aires entà descorbir naues rotes enes Andes Argentins, apròp dera ciutat de Mendoza, un des lòcs escuelhudi pes freeriders mès ausadi a causa dera sua magnitud.
Bères ues des borrasques arribèren a deishar un mètre e miei de nhèu en pòc mens de 24 ores, era quau causa hec possible qu’Aymar podesse repetir linhes que hège fòrça ans que non se podien realizar a causa dera fauta de nhèu. Aymar dauric ua naua rota ath costat deth sòn companh american, Dorian Densmore, dempús d’un periòde d’investigacion dades es desconeishudes e perilhoses condicions deth lòc.
“Aguesta sason, a part de hèr es tipiques e mitiques linhes que i a pera zòna, m’è dedicat a investigar damb auti companhs a conéisher lòcs naui, bèri uns coma eth Canal de Les sense cap descens hèt enquià aué”, declaraue Aymar Navarro entà The North Face.
“Non a estat facil donques que hérem un estudi prealable est an passat. Trobè eth Canal e baishè enquiara mitat, mès damb piolet e grampons, entà poder investigà’c e obtier un shinhau mes d’informacion. Enguan auem estat campant fòtos, en tot pujar enes montanhes dera tèsta entà veir er estat deth Canal e, coma non, en tot controtlar fòrça er estat dera nhèu, donques qu’un còp laguens d’aguest canal a on en fòrça trams non entren es esquís, mos calie “destrepar” en un mix (nhèu /ròca) entà poder seguir damb eth descens sense trèir es esquís”, seguie Aymar. “I auec moments tibants e de pòur tanben pr’amor qu’, er arribent ei un constant de 55º-60º enquia qu’acabe”.
Aymar, qu’a dedicat tota era sua vida ar esquí mès extrèm, aficion que comencèc des de fòrça petit, a volut rememoriar es sues origines en tot batiar aguesta naua rota coma Canal de Les, en aunor ara sua localitat natal dera Val d’Aran, Les.
Link video: : https://www.facebook.com/aymarnavarrofreeride/videos/vb.127444957341846/926537970765870/?type=2&theater
Aymar hè concurréncia en mès naut nivèu, en tot auer artenhut resultats entre es 10 prumèrs classificadi dera maximala competicion dera Freeride World Tour.
Eth vicesindic d’Aran e conselhèr d’Espòrts, Luís Carlos Medina, a soslinhat “Aymar s’assolide coma un des melhors riders deth panorama internacionau e ei un orgulh que pòrte eth territòri dera Val d’Aran coma estandarte”.
Aymar Navarro, signèc un convèni damb eth Conselh Generau d’Aran entà promòir era destinacion toristica esportiua Val d’Aran peth mon, representada ena imatge e enes valors deth freerider.