• Eth passat 22 de noveme era sindica d’Aran adrecèc ua carta ara ministra de Politica Territoriau entà trasladar-li era volontat deth Conselh Generau d’Aran d’arténher un reconeishement institucionau der Estat que permete garantir e consolidar er autogovèrn aranés

Era sindica d’Aran, Maria Vergés, acompanhada deth secretari generau tath Rèpte Demografic, Paco Boya, s’amassèc eth passat 19 de gèr en Madrid damb eth secretari d’Estat de Politica Territoriau, Alfredo González entà tractar sus es possibilitats de reconeishement per part der Estat ara singularitat aranesa dempús d’auer-li trasladat aguesta volontat deth govèrn aranés ara ministra.

Pendent era amassada, era sindica d’Aran presentèc ath secretari d’Estat es principaus caracteristiques der autogovèrn aranés en tot explicar-li que “actuauments era Val d’Aran non a artenhut encara eth nivèu d’autonomia politica que desiram e que mos a de perméter gestionar, de forma eficaça e efectiva aqueri servicis publics que depenen deth Conselh Generau e he’c, ath madeish temps, a trauès d’ua capacitat de decision e accion propèra e agila” expliquèc era sindica d’Aran.

Atau madeish era sindica manifestèc que “cèrtaments eth nivèu de reconeishement politic e juridic que Catalunya mos a balhat a artenhut còtes fòrça nautes, era nòsta volontat ei qu’aguest reconeishement pogue arribar tanben deth pròpri Estat Espanhòl, en tot tier en compde qu’aguest supòrt per part der Estat mos permeterie seguir auançant en desvolopament dera nòsta autonomia que non a cap mès objectiu qu’eth d’atier es besonhs e rèptes dera ciutadania aranesa”.

Era sindica d’Aran arregraïc ath secretari d’Estat era sua atencion e predisposicion e andús s’emplacèren a trobar es mecanismes e formules que permeten aguest reconeishement ath temps que, parallèlaments, se tròben, atau coma era pròpria Lei d’Aran explicite, acòrds de collaboracion en diuèrsi encastres socio economics.

Vielha, 31 de gèr de 2023