Eth govèrn d’Aran cree era Taula entar abordatge des violéncies masclistes e LGTBIfobiques dera Val d’Aran

Era creacion d’aguesta Taula de trabalh respon ara volontat deth govèrn d’Aran de consolidar e melhorar es circuits e protocòls de violéncies en territòri e adaptar-les a ua naua guardada des violéncies masclistes e LGTBIfobiques basada ena garantia des drets umans damb ua perspectiva integrau

Aguest maitin a auut lòc ena sedença deth Conselh Generau d’Aran era amassada de creacion dera Taula entar abordatge des violéncies masclistes e LGTBIfobiques dera Val d’Aran, qu’a compdat damb era preséncia dera sindica d’Aran, Maria Vergés, era conselhèra de Joenessa, Igualtat e Inclosion Sociau, Maria Menis, es principaus responsables der airau sociau des Servicis Assistenciaus Integrats dera Val d’Aran, Oficina de Joenessa deth Conselh Generau, agents sociaus deth territòri e responsables de Mossos d’Esquadra.

“Deth govèrn d’Aran ençà auem creat aguesta taula de trabalh entar abordatge des violéncies masclistes e LGTBIfobiques damb era pretension de consolidar e melhorar es circuits de violéncies en territòri aranés” asseguraue era sindica d’Aran, en tot híger que: “volem adaptar aguesti circuits a ua naua guardada des violéncies masclistes basada ena garantia des drets umans damb ua perspectiva integrau”.

Era conselhèra Menis manifestaue qu’aguesta taula: “vò esdevier un òrgan de trabalh resolutiu e capaç de préner decisions entorn ara coordinacion e eth trabalh en hilat deth circuit, en tot mantier ua guardada interseccionau compdant damb persones expertes en diferents airaus des diuèrses institucions qu’auem en nòste territòri entà non deishar a cap hemna o persona pertanhent ath collectiu endarrèr”.

Aguesta taula desvoloparà trabalhs de diagnòsi dera estructura, foncionament e enfocament des circuits, des responses generades en situacions de violéncies, remassarà punts a melhorar, prebotjarà era implicacion deth conjunt des agents deth circuit e actualizarà eth Protocòl d’abordatge des violéncies masclistes e LGTBIfobiques en Aran, autant en airau des urgéncies coma ena prevencion, atencion e reparacion individuau e comunitaria.