Eth Govern d’Aran destinarà 60.000 € entà engodronar era pista d’Aiguamòg

Vielha, 9 de març de 2018.- Eth Conselh Generau d’Aran a signat un convèni de collaboracion damb er Ajuntament de Naut Aran, entà destinar 60.000 € entà engodronar era pista d’Aiguamòg entà melhorar era seguretat e facilitar er accès en aguesta ribèra.

Ath delà, eth Govèrn d’Aran tanben a aprovat aguesta setmana era adjudicacion dera prumèra fase des òbres de melhora dera carretèra d’accès a Mont e Montcorbau ara enterpresa Construccions Pirineu 2001 SL. Eth Conselh Generau destine en aguestes òbres un pressupòst de 265.000 €. Aguesta accion en tram que va a compdar dera rotonda de Vilac tara N-230 enquiath eth crotze d’accès a Mont, consistirà en aishamplament deth viau que ges dera madeisha rotonda de Vilac e en aishamplament dera carretèra enquiath crotze deth pòble de Mont, donques aguest punt dera carretèra presente eth traçat e es amplades originaus, damb ues condicions de servici que non son adaptades as besonhs de mobilitat existenta actuauments.

Aguestes accions s’ahigen ara seguida d’accions de reequilibri territoriau qu’amie a tèrme eth Conselh Generau d’Aran pendent enguan, que passen tanben pes 50.000 € des trabalhs de melhora deth camin d’accès ath nuclèu d’Arres de Sus a compdar deth nuclèu de Bossòst, consistenti e arranjament de dus trams deth camin vesiau. Eth prumèr comence en carrèr d’Arres enquiath crotze damb era pista forestau deth Bòsc Ombrèr, e eth dusau, eth tram deth camin entre eth crotze dera pista Margalida enquiath crotze damb era pista forestau deth Bòsc Ombrèr, enes que s’a realizat er apariament dera engodronada deth camin, deth paviment der interior de bères corbes e era estabilizacion de dus esbaussaments.

En aguestes accions cau ahíger qu’era Comission de Servicis Tecnics dera Deputacion de Lhèida aprovèc eth passat mes de hereuèr era dusau fase deth projècte entara melhora d’un tram de quasi 3 km dera carretèra LV-5055 d’accès as pòbles de Vilamòs e Arres. Era accion consistirà ena melhora, condicionament, aishamplament e arranjament deth tram que va deth PK 2+840 enquiath PK 5+605, que compdarà damb ua inversion de 1.828.343,19 €. Açò permeterà qu’es vesins, tant d’Arres coma de Vilamòs, melhoren de forma substanciau era sua seguretat viau enes trajèctes jornalièrs tath trabalh.

Fin finau, arrebrembar qu’eth Conselh Generau d’Aran destine enguan 1.400.000 € deth pressupòst ara mantenença e melhora des pistes forestaus d’Aran. Ena Vau d’Aran i a apròp de 400 km de pistes forestaus, des que 164 km passen per masses d’arbes des montanhes, que hèn possible er accès as paratges mès emblematics deth país.

 

 

Comments are closed.