• Eth Conselh Generau d’Aran, a trauès de Pompièrs Emergéncies, a hèt aué era donacion d’ua ambulància 4×4 de Supòrt Vitau Basic ara Associacion d’Ucranians d’Aran e ua dotacion de materiau e medicines facilitades per Aran Salut entà balhar assisténcia medicau contunhada as victimes dera guèrra en Ucraïna

Aguest meddia a auut lòc er autrejament dera ambulància 4×4 de Supòrt Vitau Basic (USVB) cedida peth Conselh Generau d’Aran, a trauès de Pompièrs Emergéncies, ara Associacion d’Ucranians dera Alta Ribagorça e Aran. Atau madeish, Aran Salut a volut collaborar tanben damb ua dotacion de materiau e medicaments que non an de besonh recèpta entà que poguen èster emplegadi enes zònes a on se requerisque.

Aguesta siguec ua demana dera Associacion ath govèrn d’Aran, qu’a donat aguest veïcul entà proporcionar assisténcia medicau contunhada as victimes dera guèrra en Ucraïna.

Era ambulància des  Pompièrs d’Aran se trapaue dejà en desús e s’a autrejat damb er equipament basic e materiau medicau fungible entà que pogue èster emplegada deth moment dera entrega estant.

Damb aguesta donacion, era maxima institucion aranesa vò sajar d’amendrir eth dolor e patiment de tanti milèrs de persones victimes der orror e era injustícia.