-
Ena session deth Conselh de Bailes celebrada ager, era maxima institucion aranesa expausèc era volontat de poder desvolopar un Mapa d’Installacions Esportives que permete endreçar e planificar es infraestructures esportives dera Val d’Aran entà, de manèra conjunta, arténher ua maxima eficiéncia en emplec e mantenement des actuaus installacions e ena creacion de futurs espacis e equipaments esportius
Pendent era amassada deth Conselh de Bailes, mantenuda ager ena sedença deth Conselh Generau d’Aran, eth conselhèr d’Espòrts, Javier Cavero, trasladèc as bailes e bailesses des municipis e EMD araneses era volentat deth govèrn deth Conselh Generau de desvolopar conjuntamet un Mapa d’Installacions Esportives dera Val d’Aran.
“Deuant deth besonh d’endreçar e planificar es infraestructures esportives deth territòri, dera maxima institucion aranesa ençà volem conéisher era situacion des Ajuntaments en matèria esportiva entà, de manèra conjunta, arténher ua maxima eficiéncia en emplec e mantenement des actuaus installacions e ena creacion de futurs espacis e equipaments esportius”, manifestaue eth conselhèr Cavero.
Damb er objectiu de bastir un projècte que sigue util e servisque coma esturment de planificacion territoriau tath conjunt dera Val d’Aran, s’acordèc era creacion d’ua Comission de Trabalh entà poder establir un hilat equilibrat d’installacions esportives entà qu’era ciutadania pogue dispausar d’ues installacions basiques de referéncia en Aran.
“Aguest Mapa d’Installacions Esportives a d’èster un document adaptat as caracteristiques des municipis damb vision conjunta de territòri que mos a d’ajudar a enfortir e prebotjar eth desvolopament des politiques esportives ena Val d’Aran”, apuntaue tanben era sindica d’Aran, Maria Vergés.